Presidenti ukrainas, Volodymyr Zelensky informoi sot se zhvilloi bisedë telefonike me presidentin kinez, Xi Jinping, për herë të parë që nga nisja e luftës së Rusisë në Ukrainë.
"Kam pasur një telefonatë të gjatë dhe domethënëse me presidentin kinez Xi Jinping. Besoj se kjo telefonatë, si dhe emërimi i ambasadorit të Ukrainës në Kinë, do t'i japë një shtysë të fuqishme zhvillimit të marrëdhënieve tona dypalëshe", u shpreh Zelensky.
Në bisedën telefonike, Xi dhe Zelensky shkëmbyen pikëpamjet mbi krizën në Ukrainë, me Xi duke rikonfirmuar mbështetjen e Kinës për bisedimet e paqes, sipas qeverisë kineze, shkruan CNN, përcjell KosovaPress
Xi tha se Kina do të dërgojë një të dërguar të posaçëm në Ukrainë dhe vende të tjera për një zgjidhje politike të krizës ukrainase, tha qeveria, duke shtuar se Xi gjithashtu tha se Kina është e gatshme të vazhdojë të ofrojë ndihmë humanitare për Ukrainën.
Në mars, Xi u takua me presidentin rus Vladimir Putin në Moskë.
Kina ka pasur neutralitet në konfliktin midis Ukrainës dhe Rusisë, me Pekinin që bën thirrje për paqe në konflikt. Por ajo gjithashtu ka refuzuar të dënojë pushtimin e Rusisë ose të bëjë ndonjë thirrje publike për Rusinë që të tërheqë trupat e saj.
