Ministri i Mbrojtjes i Kosovës, Rrustem Berisha, sot vizitoi Ambasadën e Shqipërisë në Prishtinë për të bërë homazhe me rastin e rënies në krye të detyrës të major Klodian Tanushi dhe ushtarakes nëntetare Zarife Hasanaj, gjatë misionit të NATO-s në Letoni.
Pas homazheve ministri Berisha u nënshkrua në Librin e Zisë.
“Major Klodian Tanushi dhe Nëntetarja Zarife Hasanaj, si dëshmorë të paqes dhe sigurisë, na treguan të gjithëve se edhe mbrojtja e paqes kalon nëpër sakrifica dhe përballje me rrezikun për përmbushjen e detyrave ushtarake. Lavdi e përjetshme për dëshmorët më të rijnë të kombit shqiptar, Heronjtë e Paqes Major Klodian Tanushi dhe Nëntetare Zarife Hasanaj”, shkroi ai.
Berisha tha se populli shqiptar po kontribuon për paqe dhe siguri, ashtu siç kanë kontribuar të tjerët për lirinë e Kosovës.
“Edhe FSK-ja në të ardhmen do të jetë e gatshme që mos të jetë vetëm konsumues i sigurisë, por edhe kontribuues aktiv i saj. Edhe njëherë u shprehu ngushëllime familjeve, institucioneve dhe gjithë popullit shqiptar”, tha ai.
