Republika e Shqipërisë po përballet me një mot tejet të lig dhe shumica e qyteteve të Shqipërisë në pjesë të ndryshme janë vërshuar. Ka edhe qindra të evakuuar dhe raportohet se një person ka vdekur, si pasojë e një aksidenti të shkaktuar pikërisht nga këto kushte.
Shteti shqiptar ka angazhuar të gjithë mekanizmat për ta përballuar këtë situatë, përfshirë këtu policinë e ushtrinë.
Në këtë gjendje të jashtëzakonshme Shqipëria ende nuk ka pranuar ndonjë ndihmë nga shteti fqinj i Kosovës.
Klan Kosova ka kontaktuar me Arbër Vllahiun, zëdhënësin e Qeverisë së Kosovës dhe këshilltarin e kryeministrit, Ramush Haradinaj, por ai ka thënë se për këtë çështje t’i drejtohemi Ministrisë së Forcës dhe Sigurisë së Kosovës.
Nga MFSK-ja kanë treguar, përmes disa përgjigjeve me shkrim, se nuk kanë marrë ndonjë kërkesë nga qeveria, apo ndonjë palë tjetër për të ndërmarrë masa, porse po që se u kërkohet kanë kapacitete dhe gatishmëri ta bëjnë.
“Ministria për Forcën e Sigurisë së Kosovës nuk ka marrë asnjë kërkesë nga Qeveria e Shqipërisë, asnjë vendim për angazhim nga Qeveria e Kosovës, as urdhër nga Presidenti i R. së Kosovës për angazhim në ndihmë Qeverisë së Republikës së Shqipërisë me rastin e vërshimeve si pasojë e të reshjeve atmosferike”, ka pohuar për Klan Kosovën, Remzie Zeqiraj, oficere për marrëdhënie me publikun në ministrinë e FSK-së.
“Ministria për Forcën e Sigurisë së Kosovës konfirmon gatishmërinë për mbështetje me kapacitetet e nevojshme, po që se vendoset në organet më të larta shtetërore të Republikës së Kosovës, pas shqyrtimit të kërkesës eventuale nga Qeveria e Republikë së Shqipërisë. Deri më tani asnjë ftesë nuk ka arritur në MFSK”.
Republika e Kosovës në të kaluarën kishte ndihmuar shtetet mike në nevojë – madje edhe pa u kërkuar fare ndihmë nga ato shtete, ose edhe kur ndihma ka qenë krejt simbolike.
Një rast është ai i ndihmës prej 100.000 eurove që Qeveria e Kosovës kishte marrë vendim t’i ndante për Shtete e Bashkuara të Amerikës.
Kjo kishte ndodhur kur stuhia Harvey pati goditur Houston-in në Teksas. Stuhi që kishte lënë pas shumë viktima dhe dëme materiale prej qindra miliona dollarësh.
Ndihma kishte ardhur me kërkesën e presidentit të Kosovës, Hashim Thaçi, për qeverinë e Kosovës.
Kërkesë që çuditërisht ishte bërë përmes Facebook-ut.
