​Përurohet reparti i rinovuar i Kirurgjisë në Spitalin e Prizrenit

Prizreni

​Përurohet reparti i rinovuar i Kirurgjisë në Spitalin e Prizrenit

Më: 15 prill 2022 Në ora: 17:16
Reparti i rinovuar i Kirurgjisë në Spitalin e Prizrenit

Është përuruar sot reparti i rinovuar i Kirurgjisë në Spitalin e Prizrenit, me mbështetjen e Qeverisë së Luksemburgut. Si rrjedhojë pacientët do të kenë kushte dhe shërbime më të mira për trajtimin e problemeve shëndetësore që ata kanë.

Në një komunikatë për media të Ministrisë së Shëndetësisë bëhet e ditur se ministri Rifat Latifi ka thënë se është në frymën e angazhimeve të Ministrisë transformimi i Kirurgjisë në Kosovë dhe vet sistemi shëndetësor.

Ministri Latifi falënderoi Qeverinë e Dukatës së Madhe të Luksemburgut, të cilët financuan këtë projekt që, sipas ministrit, për rezultat do të ketë avancimin e ndërhyrjeve kirurgjike, rritjen e sigurisë e cilësisë për pacientit dhe ngritjen e motivimit për personelin shëndetësor.

“Ky investim dhe shumë investime tjera që ka bërë Qeveria e Luksemburgut, si pjesë e aktiviteteve të projektit Programi mbështetës për shëndetësi në Kosovë, tregon më së miri se bashkëpunimi i mirë që ka Kosova dhe institucionet e saj me Qeverinë e Luksemburgut, përkthehen në përfitime për qytetarët tanë”, theksoi Latifi.

Ambasadorja e Dukatës së Madhe të Luksemburgut në Kosovë, Natasha Gomes, tha se rinovimi i këtij reparti është shembull i modernizimit të shërbimeve shëndetësore për qytetin e Prizrenit dhe më gjerë.

Ajo tha se bashkëpunimi i tillë ka për qëllim përmirësimin e jetës së qytetarëve - pacientëve, që të kenë shërbime më të mira, e po ashtu edhe stafi shëndetësor kushte më të mira për punë.

Drejtori i SHSKUK-së, Valbon Krasniqi falënderoi donatorin për kontributin në përmirësimin e kapaciteteve spitalore në Komunën e Prizrenit dhe në njësitë e tjera të ShSKUK-së.

Ndërsa drejtori i Spitalit të Përgjithshëm të Prizrenit “Prim. Dr. Daut Mustafa”, Afrim Avdaj, pasi falënderoi Qeverinë e Luksemburgut për mbështetjen që ka ofruar ndër vite për këtë spital, tha se sot është një ditë shumë e madhe dhe e veçantë për për mjekët, infermierët, dhe më e rëndësishmja për qytetarët e Prizrenit, të cilët do të kenë trajtim dhe shërbime shumë më të mira.

Rinovimi i Repartit të Kirurgjisë në Spitalin e Prizrenit, është pjesë e aktiviteteve të projektit "Programi mbështetës për shëndetësi në Kosovë - faza II- KSV/017", i cili financohet nga Qeveria e Dukatës së Madhe të Luksemburgut dhe Qeveria e Republikës së Kosovës.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat