Tërmeti i dytë në Korçë nuk ka shkaktuar dëme të reja, por ka përkeqësuar gjendjen e banesave të dëmtuara.Prefekti i Korçës, Dhori Spirollari, deklaron se do të ndërhyhet në të gjitha banesat e dëmtuara, ndërsa thekson se ka përfunduar ndërhyrja në fshatin Qafëzezë.
Tërmeti i dytë me magnitudë 5.2 ballë ka rënduar gjendjen e banesave të dëmtuara nga tërmeti i mëparshëm në qytetin e Korçës.
Prefekti i qytetit juglindor, Dhori Spirollari, ka deklaruar se janë thelluar dëmet konkretisht në 6 banesa në Qafëzezë dhe në 4 të tjera Vidohovë.
Dhori Spirollari: Nuk ka banesa të reja që i janë shtuar numrit të banesave që kanë qenë të dëmtuara nga tërmeti i 1 qershorit, por ka një dëmtueshmëri më të lartë në disa nga banesat. Konkretisht, janë 6 banesa në Qafëzezë dhe 4 banesa në Vidohovë që kanë një dëmtueshmëri më të lartë nga goditjet e para të tërmeteve të mëparshme. Dy banesa në Qafëzezë janë realisht me probleme.
Prefekti i Korçës u ka bërë thirrje bashkive që t'ju qëndrojnë pranë banorëve për çdo nevojë që kanë.
Dhori Spirollari: Në rast se do të futen te grupi i dëmshpërblimit do të ketë një rivlerësim plus të vlerës, siç ka rënie të gurëve në Vidohovë.
Ky tërmet u regjistrua vetëm 5 muaj pas lëkundjeve të 1 qershorit, ku u plagosën 4 persona dhe u shkatërruan mbi 100 shtëpi.
