Tenton të gënjejë policinë por zbulohet/ Arrestohet 22-vjeçari që u paraqit i plagosur në spitalin e Elbasanit

Shqipëria

Tenton të gënjejë policinë por zbulohet/ Arrestohet 22-vjeçari që u paraqit i plagosur në spitalin e Elbasanit

Më: 27 qershor 2022 Në ora: 14:10
Foto ilustrim

Një 22-vjeçar shkoi për mjekim në spitalin e Elbasanit të dielën dhe fillimisht tha se ishte rrëzuar.

Versioni i tij ndryshoi shumë shpejt dhe para oficerëve të policisë tha se i kishin bërë atentat teksa udhëtonte me makinë… Por nuk kaloi shumë dhe policia zbuloi se në fakt i riu kishte gënjyer. Pozita e 22-vjeçarit u rëndua edhe më tej, kur në makinë i zbuluan disa mjete që dyshohet se ai do i përdorte për të vjedhur. Kështu, në përfundim ai ra në pranga.

“Specialistët për Hetimin e Krimit në Komisariatin e Policisë Peqin arrestuan në flagrancë shtetasin D. K., 22 vjeç, banues në Peqin, për veprat penale “Kallëzimi i rremë” dhe “Sigurimi i mjeteve për vjedhje”. Ditën e djeshme është paraqitur i dëmtuar në spital shtetasi D. K., i cili fillimisht ka deklaruar se ishte dëmtuar në krah pasi ishte rrëzuar. Më pas, 22-vjeçari ka deklaruar se gjatë kohës që ka qenë duke drejtuar mjetin, e kishin qëlluar me armë zjarri nga një automjet i paidentifikuar, në autostradë, por pa përcaktuar një vend specifik.

Nga veprimet hetimore dhe këqyrja e vendit të dyshuar të ngjarjes ka rezultuar se shtetasi D. K. ka dhënë deklarata të rreme përpara punonjësve të Policisë. Gjatë kontrollit në automjetin e tij, shërbimet e Policisë kanë gjetur dhe sekuestruar një kapuç, një palë doreza, një matrapik dhe një varré hekuri, pajisje të cilat dyshohet se ky shtetas i përdorte për të kryer vjedhje”, tha policia në një njoftim për rastin në fjalë.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat