SHBA ndalon gjigantin e telekomit China Unicom për shkak të shqetësimeve për spiunazh

Teknologji

SHBA ndalon gjigantin e telekomit China Unicom për shkak të shqetësimeve për spiunazh

Më: 30 janar 2022 Në ora: 23:23
Foto ilustrim

China Unicom është bërë gjiganti më i fundit kinez i telekomunikacionit që është ndaluar nga SHBA për shkak të shqetësimeve “të rëndësishme” të sigurisë kombëtare dhe spiunazhit.

Sipas medieve të huaja, Komisioni Federal i Komunikimeve (FCC) tha se kishte votuar unanimisht për revokimin e autorizimit për njësinë amerikane të kompanisë për të operuar në SHBA.

Kështu, firma duhet të ndalojë ofrimin e shërbimeve të telekomit në Amerikë brenda 60 ditëve.

Njoftimi vjen pasi rivalit më të madh China Telecom iu hoq licenca për të operuar në SHBA në tetor.

Kryetarja e FCC-së, Jessica Rosenworcel ka thënë se: “Ka pasur prova në rritje – dhe me të, një shqetësim në rritje – që transportuesit shtetërorë kinezë përbëjnë një kërcënim real për sigurinë e rrjeteve tona të telekomunikacionit”.

E China Unicom i tha BBC-së njësia e saj amerikane “ka një histori të mirë në përputhje me ligjet dhe rregulloret përkatëse të SHBA dhe ofrimin e shërbimeve dhe zgjidhjeve të telekomunikacionit si një partner i besueshëm i klientëve të saj në dy dekadat e fundit”.

“China Unicom (Hong Kong) Limited do të ndjekë nga afër zhvillimin e situatës”, është shtuar më tej.

Firmat kineze të teknologjisë dhe telekomunikacionit janë vënë në shënjestër vitet e fundit nga autoritetet amerikane për shqetësime të sigurisë kombëtare.

Në nëntor, presidenti Joe Biden nënshkroi legjislacionin që ndalon kompanitë që vlerësohen si një kërcënim sigurie nga marrja e licencave të reja të pajisjeve të telekomit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat