Autoritetet shëndetësore indiane thonë se gjetën gjashtë pozitivë me llojin e ri të koronavirusit, të cilët ishin kthyer nga Britania javët e fundit.
Lloji i ri më infektues i koronavirusit ka nxitur një valë paniku dhe mbyllje kufijsh në të gjithë botë.
Të gjashtë pacientët janë mbajtur në izolim, tha Ministria e Shëndetësisë e Indisë në një deklaratë të martën.
“Kontaktet e tyre të ngushta janë vënë gjithashtu në karantinë”, thuhej në deklaratë.
Me më shumë se 10 milionë raste, India është e dyta pas SHBA-së në listën e infektimeve nga koronavirusi.
Gati 150,000 njerëz vdiqën në Indi. Të martën u regjistruan 16,432 raste të reja të virusit, një rënie e shpejtë nga gati njëqind mijë raste në ditë sa ishte në shtator.
India ka pezulluar të gjitha fluturimet nga Britania deri në fund të muajit, por rreth 33,000 pasagjerë kishin fluturuar nga fundi i nëntorit, para se të hynte në fuqi kjo masë, tha ministria.
Nga ato udhëtime, 114 njerëz rezultuan pozitivë për koronavirus dhe mostrat e tyre po kontrolloheshin nëse ishin të variantin të ri, i cili është zbuluar në të gjithë pjesët e Europës dhe Azisë, tha ministria.
Autoritetet shëndetësore presin që të fillojnë një vaksinim për rreth 300 milionë njerëz në fillim të muajit tjetër.
