Paralajmëron ministri izraelit: Irani mund të prodhojë armë bërthamore pas 6 muajve

Azia

Paralajmëron ministri izraelit: Irani mund të prodhojë armë bërthamore pas 6 muajve

Më: 2 shkurt 2021 Në ora: 12:40
Yuval Steinitz

Ministri izraelit i Energjisë, Yuval Steinitz, të martën tha se Iranit i nevojiten vetëm gjashtë muaj për prodhimin e sasisë së mjaftueshme të lëndës për prodhimin e një arme bërthamore.

Izraeli i ka bërë thirrje administratës së re të Shteteve të Bashkuara që të mos kthehet në marrëveshjen bërthamore me Iranin dhe për një kohë të gjatë e ka kundërshtuar këtë traktat.

Sidoqoftë, administrata e presidentit të ri, Joe Biden, ka thënë se tërheqja e Shteteve të Bashkuara nga kjo marrëveshje nga ish-presidenti Trump e ka nxitur Iranin që t’i braktisë zotimet që i kishte dhënë në këtë marrëveshje.

“Në aspektin e pasurimit (të uraniumit), ata (iranianët) janë në gjendje ta arrijnë për rreth gjysmë viti, nëse bëjnë gjithçka që kërkohet. Sa i përket arsenalit bërthamor, periudha është rreth një ose dy vjet”, tha ministri izraelit.

Irani, i cili ka mohuar se planifikon prodhim të armëve bërthamore, filloi t’i shkilte pikat e marrëveshjes në vitin 2019 si reagim ndaj veprimit të Shteteve të Bashkuara, të cilat më 2018 u tërhoqën nga marrëveshja dhe i kthyen në fuqi sanksionet e ashpra kundër Republikës Islamike.

Sipas vlerësimit më të ri të vëzhguesit bërthamor të Kombeve të Bashkuara, kryer në nëntor të vitit të kaluar, rezerva e uraniumit të pasuruar e Iranit ka arritur në 2.4 tonë, mbi dhjetë herë më shumë se sasia e lejuar sipas marrëveshjes me fuqitë botërore.

Irani ka filluar ta pasurojë uraniumin në nivelin 20 për qind, ndonëse në marrëveshje i lejohet vetëm shifra prej 3.67 për qind. Megjithatë, ky numër është shumë më i vogël se përqindja e pastërtisë që llogaritet si shkallë bërthamore – 90 për qind.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat