Partia Demokratike e Koresë e opozitës kryesore të Koresë së Jugut emëroi të dielën Lee Jae-myung, ish-udhëheqësin e partisë, si kandidatin e saj për zgjedhjet e parakohshme presidenciale të planifikuara për më 3 qershor.
Lee ka udhëhequr sondazhet e opinionit prej javësh me një hendek dyshifror ndaj konkurrentëve nga Partia konservatore e Pushtetit Popullor, e cila do të emërojë kandidatin e saj më 3 maj.
“Që nga ky moment, Lee Jae-myung nuk është vetëm kandidati i Partisë Demokratike, por edhe kandidati i të gjithë njerëzve që dëshirojnë fundin e kryengritjes, një tejkalim të krizës, për ata që kërkojnë unitet dhe lumturi”, tha Lee në një fjalim pranimi, pasi fitoi kandidaturën e partisë së tij.
Lee tha se ai do të forcojë aftësitë mbrojtëse të Koresë së Jugut dhe do të punojë për ta bërë vendin një lider në industritë e teknologjisë së lartë, një fuqi kulturore dhe një demokraci shembullore.
Lee udhëhoqi Partinë Demokratike drejt një fitoreje dërrmuese në zgjedhjet parlamentare në 2024 dhe pritej gjerësisht të fitonte zgjedhjet paraprake, pasi ai mundi lehtësisht dy kandidatë të tjerë nga partia e tij në zgjedhjet paraprake rajonale.
Juristi 61-vjeçar i kthyer në politikan humbi zgjedhjet e fundit presidenciale më 2022, me diferencën më të vogël në historinë demokratike të Koresë së Jugut.
Ato zgjedhje u fituan nga Yoon Suk Yeol, i cili u fajësua nga Gjykata Kushtetuese në fillim të këtij muaji për vendosjen e tij afatshkurtër të ligjit ushtarak.
Në një fjalim të veçantë më herët të dielën, Lee e krahasoi përpjekjen e Yoon për të vendosur ligjin ushtarak me abuzimet nga liderët e mëparshëm autoritarë, duke premtuar se do ta udhëheqë vendin nga kriza e tij politike dhe ekonomike, duke përfshirë lehtësimin e tensioneve me Korenë e Veriut.
Lee ishte ndër ligjvënësit që nxituan në Asamblenë Kombëtare natën e shpalljes së ligjit ushtarak të Yoon më 3 dhjetor, për të siguruar që parlamenti të votonte kundër urdhrit ushtarak.
Vitin e kaluar, Lee i mbijetoi një sulmi me thikë në qytetin jugor të Busanit, ndërsa vizitonte vendin e një aeroporti të ri të propozuar dhe duke folur me gazetarët dhe mbështetësit.
Lee, i cili u bë lider i partisë në vitin 2022 dhe dha dorëheqjen në fillim të këtij muaji për të kandiduar për presidencën, nuk është i panjohur për polemika.
Në fillim të këtij viti, një gjykatë e Apelit hodhi poshtë vendimin e tij fajtor, për akuzat për shkelje të ligjit zgjedhor më herët, megjithëse Gjykata e Lartë po shqyrton çështjen për një vendim përfundimtar.
Ai gjithashtu përballet me disa gjyqe për çështje që, variojnë nga ryshfeti deri tek akuzat që lidhen kryesisht me një skandal të zhvillimit të pronës prej 1 miliard dollarësh.
Përpara se të bëhej kreu i Partisë Demokratike, Lee shërbeu gjithashtu si kryebashkiak i Seongnam dhe guvernator i provincës Gyeonggi, më e populluara në vend.
