Sekretari amerikan i Mbrojtjes Pete Hegseth ka paralajmëruar se Kina përbën një kërcënim "të menjëhershëm" për Tajvanin dhe u bëri thirrje vendeve aziatike të rrisin shpenzimet e mbrojtjes dhe të bashkëpunojnë me Shtetet e Bashkuara për të parandaluar luftën.
Duke folur në një konferencë sigurie Shangri-La në Singapor sot, ku morën pjesë shumë zyrtarë të lartë të mbrojtjes nga Azia dhe Perëndimi, Hegseth tha se Shtetet e Bashkuara nuk duan të dominojnë apo shtypin Kinën, por se nuk do të tërhiqen nga rajoni ose nuk do të lejojnë që aleatët e saj të frikësohen.
Hegseth paralajmëroi se Kina po përgatitej në mënyrë të besueshme të përdorte forcën ushtarake për të ndryshuar ekuilibrin e fuqisë, duke përmendur afatin e vitit 2027 që zyrtarët amerikanë thanë se presidenti Xi Jinping kishte vendosur si një objektiv për aftësinë për të pushtuar Tajvanin, raporton KosovaPress.
"Kina po ndërton një ushtri për të, po stërvitet për të çdo ditë dhe po praktikon për luftë. Çdo përpjekje e Kinës komuniste për të kapur Tajvanin me forcë do të kishte pasoja shkatërruese për rajonin Indo-Paqësor dhe të gjithë botën. Ne nuk do ta shpërfillim atë - kërcënimi është real. Dhe mund të jetë i pashmangshëm," tha sekretari amerikan i Mbrojtjes.
Kina u përgjigj duke akuzuar Shtetet e Bashkuara se janë "përçarësit më të mëdhenj" të paqes në rajon.
Ambasada kineze në Singapor shkroi në Facebook se fjalimi ishte "plot provokim dhe nxitje", duke akuzuar Hegseth për "shpifje të vazhdueshme të Kinës dhe ekzagjerim të të ashtuquajturit kërcënim kinez".
