SHBA-ja, Egjipti, Katari dhe Turqia nënshkruajnë dokument për marrëveshjen e Gazës
Në samitin për paqe në Egjipt, presidenti amerikan, Donald Trump, nënshkroi një dokument me Egjiptin, Turqinë dhe Katarin, për marrëveshjen e armëpushimit në Gazë.
Në këtë samit po marrin pjesë mbi 20 udhëheqës nga shtetet më të fuqishme të botës.
Në Egjipt, Trump nisi fjalimin duke treguar se çfarë dokumenti po nënshkruajnë.
“Ne do të nënshkruajmë një dokument që do të shpalosë detaje të shumë rregullave dhe gjëra të tjera. Është dokument shumë gjithëpërfshirës”, tha ai.
Ndërkaq, duke e nënshkruar dokumentin ai tha: “U deshën 3.000 vjet të arrinim në këtë pikë. A mund ta besoni? Do të respektohet”, tha ai. / REL
Izraeli: Afër 2.000 palestinezë janë liruar nga burgjet izraelite
Shërbimi i burgjeve i Izraelit tha të hënën se ka liruar pothuajse 2.000 persona, shumica të ndaluar palestinezë, si pjesë e marrëveshjes së armëpushimit në Gazë.
Sipas njoftimit, “1.968 terroristë u transferuan nga disa burgje në mbarë vendin në burgjet Ofer dhe Ktziot. Pas miratimeve përkatëse, ata u liruan në Bregun Perëndimor dhe Jerusalemin Lindor”.
Ushtria izraelite: Mbetjet mortore të dy pengjeve i janë dorëzuar Kryqit të Kuq
Trupat e dy pengjeve të vdekura izraelite, që po mbaheshin në Gazë, i janë dorëzuar Kryqit të Kuq nga Hamasi – grupi palestinez i shpallur organizatë terroriste nga SHBA-ja dhe BE-ja – tha ushtria izraelite.
Ushtria shtoi se mbetjet mortore edhe të dy pengjeve po ashtu pritet të transferohen.
“Sipas informacioneve të dhëna nga Kryqi i Kuq, dy arkivole me pengje të vdekur janë transferuar nën kujdesin e tyre dhe janë në rrugë drejt forcave [izraelite] në Rripin e Gazës”, tha ushtria izraelite.
Trump në Egjipt thotë se faza e dytë e bisedimeve për marrëveshjen ka nisur
Presidenti amerikan, Donald Trump, tha se Egjipti ka luajtur “rol të rëndësishëm” për marrëveshjen për lirimin e pengjeve, teksa nisi takimin me kreun e shtetit, Abdel Fatal al-Sisi.
I pyetur nga gazetarët në Egjipt se kur do të nisin bisedimet për fazën e dytë të bisedimeve për planin e tij 20 pikësh për Gazën, Trump konfirmoi se ato veçse kanë nisur.
Ndërkaq, presidenti i Egjiptit tha se do që të sigurohet që armëpushimi në Gazë të respektohet.
Udhëheqësit mblidhen në Egjipt
Teksa presidenti amerikan, Donald Trump, po përmbyll vizitën në Izrael, në Egjipt më shumë se 20 udhëheqës botërorë po mblidhen në Sharm el-Sheik.
Trump do t’i bashkohet samitit disa orë më vonë. Në mesin e udhëheqësve janë presidenti i Francës, Emmanuel Macron, ai i Turqisë, Recep Tayyip Erdogan dhe kryeministri britanik, Keir Starmer.
Trump do të udhëheqë takimin së bashku me presidentin e Egjiptit, Abdel Fattah al-Sisi, teksa udhëheqësit synojnë të finalizojnë marrëveshjen për përfundimin e luftës në Gazë.
Hamasi – grupi palestinez i shpallur organizatë terroriste nga SHBA-ja dhe BE-ja – ende nuk ka pranuar në tërësi planin 20 pikësh të Trumpit, edhe pse armëpushimi ka hyrë në fuqi dhe pengjet janë liruar.
Presidenti Trump përfundon fjalimin në Parlamentin izraelit
Presidenti amerikan, Donald Trump, ka përfunduar fjalimin e tij në Parlamentin izraelit, ku deklaroi se të gjithë janë dëshmitarë të një agimi historik të një Lindjeje të Mesme të re.
Trump e përmbylli fjalimin duke thënë se “që nga dita e parë kur u krijua Izraeli modern, ne kemi qëndruar së bashku në kohë të vështira dhe në fitore e humbje”.
“Dhe, gjatë kësaj jave, përkundër të gjitha, ne e kemi arritur të pamundurën dhe i sollëm pengjet në shtëpi”.
Gjatë qëndrimit në Izrael, ai do të takohet me familjarët e pengjeve, para se të niset për në Egjipt për të nisur një samit për paqe në Lindjen e Mesme. Në këtë samit pritet të marrin pjesë 20 udhëheqës të shteteve më të fuqishme në botë.
Para Parlamentit izraelit, Trump foli edhe se si shtetet e Lindjes së Mesme nuk duhet të krijojnë armiq, por të punojnë së bashku për të krijuar “mundësi dhe prosperitet”.
Sipas udhëheqësit amerikan “në vend që të krijojnë armë”, shtetet e këtij rajoni duhet të përqendrohen që të ndërtojnë shkolla, të investojnë në shëndetësi, industri dhe inteligjencë artificiale.
“Edhe ndaj Iranit, regjimi i të cilit ka shkaktuar aq shumë vdekje në Lindjen e Mesme, dora e miqësisë dhe bashkëpunimit është e zgjatur”, tha presidenti Trump.
Trump: Ky është agimi historik i një Lindjeje të Mesme të re
Përgjatë fjalimit, i cili është ndërprerë për pak, Trump ka thënë se të gjithë janë dëshmitarë të një agimi historik të një Lindjeje të Mesme të re.
Ai e ka falënderuar kryeministrin izraelit, Benjamin Netanayhu për bashkëpunimin, si dhe vendet arabe që i kanë lehtësuar negociatat.
Tani do të jetë “koha e artë për Izraelin, koha e artë për gjithë rajonin”, ka deklaruar Trump.
Trump niset drejt Egjiptit
Presidenti amerikan, Donald Trump, është nisur nga Izraeli drejt Egjiptit, ku do të marrë pjesë në samitin për paqe që mbahet në Sharm el-Sheik.
Në këtë samit marrin pjesë udhëheqës nga shtetet e fuqishme botërore.
Trump nis fjalimin në Parlamentin e Izraelit
Presidenti amerikan, Donald Trump është pritur me duartrokitje dhe festë në Parlamentin e Izraelit në Jerusalem, teksa e ka nisur fjalimin.
“Vend i mirë, njëmend vend i mirë”, ka thënë ai.
“Jemi mbledhur në një ditë gëzimi të thellë dhe shprese të madhe”.
“Pas dy vjetëve të tmerrshëm në errësirë dhe robëri, 20 pengje guximtare po kthehen te familjet e tyre. Edhe 28 tjerë po vijnë në shtëpitë e tyre për të gjetur paqen në këtë vend të shenjtë”.
“Armët kanë rënë në heshtje dhe rajoni është në paqe”, ka thënë mes tjerash Trump.
Çfarë ndodhi?/ Ndërpritet fjalimi i Trump në Izrael, sigurimi ndërhyn me urgjencë
Fjalimi i presidentit amerikan Donald Trump në parlamentin izraelit u ndërpre për pak.
Sipas pamjeve të publikuara në rrjete sociale, ai u ndërpre nga dy anëtarë të krahut të majtë të Knessetit, të cilët u ndaluan nga sigurimi.
Ofer Cassif, një politikan 60-vjeçar, u nxor jashtë nga sigurimi pas një zhurme të lartë dhe britmash drejt Trumpit.
Ayman Odeh, 50 vjeç, një tjetër anëtar i Knessetit nga i njëjti grup politik i aleancës Hadash, u nxor gjithashtu nga salla.
"Më vjen keq për këtë, president,", i tha kryetari i Knessetit Trumpit më pas.
"Kjo ishte shumë efikase",, bëri shaka presidenti amerikan, ndërsa anëtarët e Knessetit brohorisnin emrin e tij.
Ndryshe, ende e paqartë se çfarë synonin personat që u nxorën jashtë nga sigurimi.
Raportohet se ata kishin në dorë pankarta ku shkruhej "gjenocid".