Ushtria siriane ka përparuar në terren drejt zonave në lindje të qytetit të Halepit, pas fillimit të tërheqjes së forcave kurde nga këto rajone.
Forcat qeveritare janë parë duke hyrë në qytezën Deir Hafer, rreth 50 kilometra në lindje të Halepit.
Të premten, milicia kurde e Forcave Demokratike Siriane (SDF) njoftoi se do të ripozicionojë trupat e saj në lindje të lumit Eufrat.
Ky vendim erdhi pas bisedimeve me zyrtarë amerikanë dhe pas zotimeve të presidentit sirian Ahmed al-Sharaa për njohjen dhe zyrtarizimin e të drejtave kombëtare të kurdëve, përfshirë gjuhën kurde si gjuhë zyrtare.
Pas përleshjeve vdekjeprurëse të javës së kaluar, Shtetet e Bashkuara u kanë bërë thirrje palëve të shmangin përshkallëzimin e mëtejmë të konfliktit. Presidenti i Sirisë, Ahmed al-Sharaa, ka deklaruar se synon integrimin e strukturave ushtarake dhe civile kurde në institucionet shtetërore siriane.
Para tërheqjes së forcave kurde, presidenti sirian kishte paralajmëruar gjithashtu njohjen e Vitit të Ri Kurd si festë zyrtare në Siri. Dekreti presidencial, i shpallur të premten, përfaqëson njohjen e parë zyrtare të të drejtave kombëtare të kurdëve që nga pavarësia e Sirisë në vitin 1946.
Në dokument theksohet se kurdët janë pjesë thelbësore dhe integrale e shtetit sirian, duke pranuar se ata kanë qenë subjekt i dekadave të shtypjes sistematike nën regjimet e mëparshme.
