Britania e Franca në bisedime për njohjen e Palestinës

Bota

Britania e Franca në bisedime për njohjen e Palestinës

Më: 30 prill 2025 Në ora: 20:13
Ilustrim

Britania e Madhe është në bisedime me Francën dhe Arabinë Saudite për njohjen e shtetit palestinez në një konferencë në qershor, të cilën të dy vendet po e presin për të mbajtur një rrugë politike drejt një zgjidhjeje me dy shtete në Lindjen e Mesme, tha sot sekretari i Jashtëm britanik, David Lammy.

Kjo është hera e parë që Londra zyrtare konfirmon publikisht se po zhvillon bisedime me Francën për procesin e njohjes së Palestinës në kuadër të konferencës së ardhshme.

Njohja britanike dhe franceze e Palestinës do të dërgonte një mesazh të fortë politik, por ajo përballet me një sërë pengesash diplomatike, duke përfshirë nevojën për qartësi më të madhe rreth propozimeve franceze dhe pyetjen nëse njohja mund të jetë pjesë e një procesi të besueshëm drejt një zgjidhjeje me dy shtete, të cilën Izraeli e kundërshton, shkruan Guardian.

Lammy tha në Komitetin e Marrëdhënieve Ndërkombëtare të Dhomës së Lordëve, se Britania donte të merrte hapin nëse do të kishte një ndikim real në terren, jo vetëm simbolik, duke shtuar se përfundimi i tij i trishtuar ishte se njohjet e fundit të Palestinës nuk kishin pasur asnjë efekt.

Duke kujtuar se 160 vende e kanë njohur tashmë Palestinën, duke përfshirë së fundmi Spanjën, Norvegjinë dhe Irlandën, Lammy tha: "Askush nuk ka të drejtën e vetos për njohjen e një shteti palestinez nga Britania e Madhe... Ne kemi argumentuar gjithmonë se njohja nuk është një qëllim në vetvete dhe ne preferojmë njohjen si pjesë e një procesi me dy shtete".

“Presidenti Macron foli për këtë, herën e fundit së bashku me sauditët, dhe sigurisht që ne jemi aktualisht në bisedime me ta”, shtoi Lammy.

Spekulimet e fundit për njohjen e Palestinës u ndezën nga presidenti Emmanuel Macron pas kthimit të tij nga Egjipti më 9 prill, kur tha se Franca ndoshta mund ta njohë Palestinën në një konferencë në qershor. Do të ishte hera e parë që një anëtar i G7-së do ta njohë Palestinën.

Disa ditë më vonë, Macron sqaroi se masa duhet të "shkaktojë një sërë njohjesh të tjera... duke përfshirë njohjen e Izraelit nga vendet që nuk e njohin aktualisht", gjë që mund të lejojë Francën të tërheqë njohjen nëse nuk arrihet përparim.

Kryeministri izraelit Benjamin Netanyahu më pas telefonoi Macron dhe i tha se njohja e Palestinës do të ishte një fitore për Hamasin dhe Iranin..

comment Për komente lëvizni më poshtë
Sot mund të lexoni Shfletoni kopertinat