Drejtuesit e ekipeve të Formula 1 kanë zgjedhur 10 pilotët më të mirë për vitin 2023.
Gara po mbahet për të gjashtin vit radhazi dhe shefat e ekipeve u ngarkuan të zgjidhnin dhjetë pilotët më të mirë, megjithatë, vlerësimet që ata dhanë mbetën sekret.
Siç pritej, piloti holandez i Red Bull Racing, Max Verstappen, u zgjodh si piloti më i mirë, pasi fitoi me dominim të plotë titullin e tij të tretë radhazi në kampionatin botëror në Formula 1. Max shënoi 19 fitore në 22 gara dhe ka 290 pikë më shumë se shoku i skuadrës dhe nënkampioni, Sergio Perez.
Megjithatë, Perez nuk është në vendin e dytë në përzgjedhjen e shefave të ekipit, por ka zënë vetëm pozitën e dhjetë.
Vendi i dytë në fakt shkoi për veteranin Fernando Alonso, i cili ishte mbresëlënës në sezonin e tij të parë me Aston Martin. Spanjolli shënoi tetë podiume dhe përfundoi i katërti në renditjen përfundimtare të pilotëve.
Ylli i McLaren, Lando Norris përfundoi i treti me shtatë podiume. Ai ishte i dyti gjashtë herë në sezonin e kaluar. Piloti i Ferrarit, Charles Leclerc, zuri vendin e katërt në zgjedhjen e drejtuesve të ekipit.
Pozita e pestë shkoi për veteranin e Mercedes, Lewis Hamilton, i cili përfundoi sezonin e tij të dytë radhazi pa fitore. Megjithatë, ai ishte i treti në renditjen e pilotëve në fund të sezonit.
Piloti i Ferrarit, Carlos Sainz, i vetmi që “vodhi” fitoren nga pilotët e Red Bull Racing këtë vit duke triumfuar në Singapor. Ai u radhit në vendin e gjashtë përpara Oscar Piastri të vendit të shtatë, një australian që ka përfunduar sezonin e tij të parë në McLaren, ndërkohë vendi i nëntë u rezervua për Alex Albon.
George Russell i Mercedes u rendit i nënti dhe Perez në vendin e dhjetë në përzgjedhjen e drejtuesve të ekipit.
Shefat e ekipit që zgjodhën pilotët më të mirë janë Alessandro Alunni Bravi, Bruno Famin, Christian Horner, Mike Krack, Guenther Steiner, Andrea Stella, Franz Tost, Fred Vasseur, James Vowles dhe Toto Wolff.
