Nënkryetari Mujka vizitoi shoqatën “Zëri i Prindërve” dhe biseduan me kryetarin Bajram Qerkini për aktivitetin, hallet dhe problemet me të cilat përballen

Mitrovica

Nënkryetari Mujka vizitoi shoqatën “Zëri i Prindërve” dhe biseduan me kryetarin Bajram Qerkini për aktivitetin, hallet dhe problemet me të cilat përballen

Nga: F.B Më: 28 prill 2021 Në ora: 12:28
Mujka dhe Bahtiri

Nënkryetari i komunës Faruk Mujka i shoqëruar nga drejtoresha e drejtorisë së administratës komunale Valmira Sylejmani dhe Fitim Rama shefi i zyrës komunale të mbrojtjes së drejtave të njeriut kanë qëndruar në selinë e shoqatës “Zëri i prindërve” ku u pritën nga kryetari i shoqatës Bajram Qerkini dhe asistentja Xhyla Haziri.

Me këtë rast Bajram Qerkini i ka njoftuar zyrtarët komunal lidhur me aktivitetet që po zhvillohen, planin vjetor të punës dhe përkushtimin në vazhdimin e hulumtimit për zbardhjen e fatit të gjithë personave që ende ndodhen në listën e personave të pagjetur .

Qerkini posaçërisht ka kërkuar koordinim të veprimit dhe mbështetje të punës dhe aktiviteteve të shoqatës, qoftë në mirëmbajtjen e zyrës, zhvillimin e aktiviteteve por edhe shënimin e ditëve të masakrave, aktivitete këto që vazhdimisht organizohen nga shoqata së bashku me familjarët e personave të pagjetur.

Pasi në takim ndodheshin edhe grupi i të rinjve vullnetar që ndihmojnë aktivitetin e shoqatës, Qerkini ka kërkuar mbështetje për realizimin e projekteve të ndryshme për të rinjtë qoftë në socializmin, apo trajnimin e ndryshëm që do ndihmojnë integrimin e të rinjve nga familjet me persona të pagjetur në shoqëri.

Temë e pashmangshme ishte edhe projekti i ndërtimit të obeliskut , që është parashikuar të ndërtohet tek sheshi afër palestrës së sporteve, si dhe çështja e ndërtimit të shtëpisë muze në lagjen boshnjake e cila po zhargitet me vite.

Nënkryetari Mujka ka theksuar se vlerëson punën që bëhet në shoqatë dhe misionin që ka shoqata për zbardhjen e fatit të personit të fundit të pagjetur, ndërkohë që ka premtuar mbështetje për punën dhe aktivitetet e shoqatës konform mundësive që ka komuna për këto aktivitete.

Ai premtoi se do të angazhohet që të mbështetet aktiviteti dhe puna e shoqatës, sikurse edhe projektet që janë parashikuar për ndërtimin e obeliskut dhe shtëpisë muze në lagjen e boshnjakëve.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat