Presidenti i Shqipërisë, Ilir Meta dekreton ndryshimet në kabinetin qeverisës të kryeministrit Rama.
Presidenti i Shqipërisë, Ilir Meta, dekretoi Olta Xhaçkën si Ministre për Evropën dhe Punët e Jashtme dhe Niko Peleshin në detyrën e Ministrit të Mbrojtjes.
Ndryshimet e sapodekretuara në qeverinë Rama janë të tretat brenda këtij viti: në shtator dha dorëheqjen Besa Shahini, Ministre e Arsimit, në fillim të dhjetorit dha dorëheqjen Sandër Lleshaj Ministër i Brendshëm, gjë që solli ndryshime të tjera në qeveri, ku në vend të Lleshajt u emërua Blendi Çuçi, ish-Ministër i Bujqësisë dhe në vend të tij Milva Ekonomi.
Me dorëheqjen e Gent Cakajt dhe më parë të Besa Shahinit, kabineti qeverisës Rama nuk ka më asnjë anëtar nga Kosova në kabinetin qeverisës.
Ndryshimet në qeveri dhe zgjedhjet parlamentare 2021
Opinionistë të pavarur në mediat e Tiranës i konsiderojnë ndryshimet e fundit në kabinetin Rama, në funksion të zgjedhjeve parlamentare të pranverës 2021 dhe llogarive elektorale për zgjedhjet parlamentare të 25 prillit 2021.
Këto ndryshime sjellin në diplomaci dhe mbrojtje, dy poste këto të rëndësishme, Olta Xhaçkën nga qarku i Dibrës dhe Niko Peleshin nga qarku i Korcës.
Nga 12 qarqe që ka Shqipëria, në 8 prej tyre si të kandidatë të PS për zgjedhjet e ardhshme parlamentare janë ministra në kabinetin qeverisës aktual të kryeministrit Rama./DW/
