Ndryshon buxheti në fund të vitit/ Jepen para për shpërblimin e pensionistëve, rindërtimin dhe borxhin e bashkive

Shqipëria

Ndryshon buxheti në fund të vitit/ Jepen para për shpërblimin e pensionistëve, rindërtimin dhe borxhin e bashkive

Më: 7 dhjetor 2021 Në ora: 16:09
Foto ilustrim

Qeveria ka ndryshuar për të gjashtën herë me akt normativ, buxhetin e vitit 2021.

Financat kanë vënë në dispozicion fondin për bonusin e pensionistëve prej 3.5 miliardë lekë, ku tashmë rreth 638 mijë pensionistë do të përfitojnë shpërblimin prej 5 mijë lekë.

Sipas aktit normativ të botuar në Fletoren Zyrtare, shpenzimet buxhetore me këto ndryshime rriten me 18.2 miliardë lekë duke e çuar totalin e tyre në 610 miliardë lekë.

Veç bonusit të pensionistëve, një pjesë e konsiderueshme ka shkuar shtesë për rindërtimin duke e çuar në 35 miliardëve lekë fondin, nga 28 miliardë lekë që ishte planifikuar më herë.

Po ashtu qeveria ka alokuar dhe 500 milionë lekë si transfertë specifike për 61 bashkitë e vendit për shlyerjen e detyrimeve të prapambetura, një nga shqetësimet kryesore të pushtetit vendor.

Ndër të tjera, me rialokimet e fundit 600 milionë lekë fonde të pashfrytëzuara brenda dikasterit të bujqësisë kanë shkuar si mbështetje direkte për blegtorët dhe bletarët.

Financat kanë rritur pritshmëritë edhe për të ardhurat buxhetore duke e çuar totalin e tyre në 507.7 miliardë lekë në fund të vitit, në rritje me rreth 18.2 miliardë lekë më shumë se akti i parafundit normativ i buxhetit.
Teksa të ardhurat dhe shpenzimet janë prekur, defiçiti buxhetor ka mbetur i pandryshuar dhe planifikohet në vlerën e 120.5 miliardë lekëve në fund të këtij viti.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat