Rama takon ambasadoren Kim para vizitës në SHBA

Shqipëria

Rama takon ambasadoren Kim para vizitës në SHBA

Më: 9 shkurt 2022 Në ora: 13:03
Foto nga takimi

Kryeministri Edi Rama ka takuar ambasadoren amerikane, Yuri Kim këtë të mërkurë, para vizitës së tij në SHBA.

Ajo përshëndeti mbështetjen e fortë të Shqipërisë për Ukrainën përballë agresionit rus, një nga çështjet më të nxehta aktualisht të politikës së jashtme.

“Ambasadorja Kim u takua sot me kryeministrin Rama përpara vizitës së tij në Uashington DC. Ajo përshëndeti mbështetjen e fortë dhe parimore të Shqipërisë për Ukrainën përballë agresionit rus, qoftë si aleate e NATO-s ashtu edhe në Këshillin e Sigurimit të OKB-së, ku SHBA-të janë krenare që do të punojnë me Shqipërinë si “bashkë-penëmbajtëse” për Këshillin në çështjet e Ukrainës. Ambasadorja Kim nënvizoi se lufta kundër korrupsionit është prioritet kryesor për Shtetet e Bashkuara, duke vërejtur se barra e përgjegjësisë është natyrshëm më e madhe mbi ata që qeverisin. Ata biseduan gjithashtu mbi rëndësinë e forcimit të institucioneve demokratike, përparimin historik në forcimin e marrëdhënies sonë në mbrojtje, dhe hapat e mëtejshëm për të rritur tregtinë dhe investimet midis SHBA-së dhe Shqipërisë”, thuhet në njoftim. 

Mesi i muajit shkurt do ta gjejë kryeministrin Edi Rama në OKB nga ku do të marrë pjesë edhe në mbledhjen e radhës të Këshillin të Sigurimit.

Gjatë qëndrimit në SHBA, kryeministri Rama do të shkojë edhe në Uashington, pasi ka marrë një ftesë për t’u takuar me Antony Blinken, sekretar amerikan i shtetit.

Ky do të jetë takimi i dytë mes Edi Ramës dhe sekretarit Blinken, pas atij të 13 Qershorit 2021 në Bruksel, ku SHBA dhe Shqipëria nënshkruan memorandumin për sigurinë e 4G dhe 5G.

Sakaq në 19 Gusht 2021 sekretari Blinken i telefonoi kryeministrit Edi Rama për ta falënderuar pas gatishmërisë për të pritur qytetarët afgan në nevojë.

Administrata e presidentit Biden përmes sekretarit Blinken po tregon një vëmendje të posaçme ndaj rajonit tonë, e cila ishte zbehur vitet e fundit.

Vetë sekretari Blinken emëroi tre muaj më parë, Gabriel Escobar si të dërguar special për Ballkanin.

Ky takim i kryeministrit Edi Rama me sekretarin Blinken vjen në një kohë kur në Shqipëri ish kryeministri Sali Berisha ka intensifikuar retorikën anti amerikane pas shpalljes Non Grata.

Madje në mënyrë të paprecedentë si asnjë prej 200 personave non grata nga SHBA, ndërmori dorëzimin e një padie ndaj sekretarit Blinken në një gjykatë franceze.

Pasi i qëndroi stoik kërkesës amerikane për Sali Berishën, ftesë për të vizituar Uashingtonin ka marrë edhe kreu PD Lulzim Basha, gjatë vizitës të fundit në Tiranë të Gabriel Escobar.

commentFirst article
Sot mund të lexoni Shfletoni kopertinat