Në kuadër të masave për parandalimin dhe kontrollin e përhapjes së sëmundjes Murtaja e Ruminantëve të Vegjël (PPR) në territorin e Republikës së Shqipërisë, Ministria e Bujqësisë dhe Zhvillimit Rural ka urdhëruar ndalimin e përkohshëm të lëvizjes së kafshëve të gjalla të llojit dhen dhe dhi, në të gjithë vendin.
Konkretisht, ndalohet lëvizja e këtyre kafshëve:
Nga një fermë në një tjetër;
Në kullota dhe mjedise të hapura;
Në panaire, tregje kafshësh dhe çdo formë tjetër grumbullimi.
Lëvizja e kafshëve të gjalla lejohet vetëm në drejtim të thertoreve, duke u shoqëruar detyrimisht me certifikatë shëndetësore veterinare, e cila duhet të jetë e lëshuar nga Veterineri Zyrtar përkatës.
Kjo masë ka karakter të përkohshëm dhe është ndërmarrë në funksion të mbrojtjes së shëndetit të kafshëve, sigurisë ushqimore dhe interesit të blegtorëve në vend.