Në Gjykatën e Posaçme u zhvillua seanca për vlerësimin e masës së sigurisë ndaj kreut të Komisionit të Prokurimeve Publike, Jonaid Myzyri, i cili akuzohet nga SPAK për shkelje të barazisë në tendera dhe kryerje të veprimeve të paligjshme në bashkëpunim.
Gjatë seancës, u vendos që masa e “pezullimit nga detyra” dhe “detyrimi për t’u paraqitur” të mbetet në fuqi. Myzyri, i cili u bë i pandehur më 24 qershor, është i akuzuar për një tender të kontestuar, atë për mirëmbajtjen e aksit rrugor Shpal-Ura e Repsit, i cili ka një vlerë prej 2.29 milionë eurosh dhe një gjatësi prej 58.7 km.
Sipas SPAK, tenderi ka pasur shkelje të procedurave ligjore dhe paligjshmëri të evidentuara nga autoriteti kontraktor, të cilat Komisioni i Prokurorimeve Publike nuk i ka marrë parasysh. Për këtë çështje, janë pandehur edhe 7 zyrtarë të tjerë dhe 3 përfaqësues të kompanive të ndërtimit.
Procedurat e hetimit vijojnë dhe seanca e radhës do të sjellë më shumë detaje mbi këtë çështje të rëndësishme për transparencën dhe luftën kundër korrupsionit në tendera publikë.