Universiteti i Tetovës dhe Universiteti "Kadri Zeka" vazhdojnë bashkëpunimin - Bota Sot
Universiteti i Tetovës dhe Universiteti "Kadri Zeka" vazhdojnë bashkëpunimin

Tetova

Universiteti i Tetovës dhe Universiteti "Kadri Zeka" vazhdojnë bashkëpunimin

Më: 20 mars 2019 Në ora: 13:50
Universiteti i Tetovës dhe Universiteti "Kadri Zeka"

Bashkëpunimi i deritanishëm mes Universitetit “Kadri Zeka” nga Gjilani i Republikës së Kosovës dhe Universiteti i Tetovës, ka qenë në nivel dhe se i njëjti duhet të vazhdojë mes dy institucioneve të arsimit të lartë me qëllim lehtësimin e lëvizjes së kuadrove të mësimdhënësve, por edhe të studentëve, si dhe organizimit të përbashkët dhe pjesëmarrjes në seminare, kurse, konferenca dhe projekte të ndryshme kërkimore – shkencore me karakter ndërkombëtar, u konkludua në takimin e djeshëm mes delegacionit universitar kosovar të kryesuar nga Rektori Bajram Kosumi dhe rektorit të UT-së, Vullnet Ameti.

Ameti, tha se Universiteti i Tetovës përveç bashkëpunimit që ka me shumë universitete ndërkombëtare, rëndësi të posaçme i kushton edhe bashkëpunimit me universitetet shqiptare nga vendi, Shqipëria dhe Kosova duke i kushtuar vëmendje shkëmbimit reciprok të kuadrit të stafit akademik, studentëve, si dhe shkëmbimit të ndërsjellë të informacioneve arsimore dhe shkencore.

Ndërsa Rektori i Universitetit “Kadri Zeka” nga Gjilani, Bajram Kosumi, e falënderoi atë dhe ekipin e tij për mikpritjen si dhe bashkëpunimin korrekt që kanë treguar deri më tani. Ai mes të tjerash shtoi se Universiteti “Kardi Zeka” si një universitet i ri për nga mosha, ka nevojë për përvojat dhe eksperiencat e Universitetit të Tetovës si në veprimtarinë arsimore – shkencore, por edhe në atë të bashkëpunimit ndërinstitucional me universitetet tjera nga vendi, rajoni dhe bota.

Pas përfundimit të takimit, siç informojnë nga shërbimi informativ i UT-së, dy rektorët shkëmbyen dhurata mes tyre dhe bashkërisht vizituan edhe disa laboratorë: atë të Fakultetit të Teknologjisë Ushqimore dhe të Ushqyerit, laboratorin e kimisë të Fakultetit të Shkencave Matematike-Natyrore si dhe laboratorin e ndërtimit në Fakultetin e Shkencave të Zbatuara.

Universiteti i Tetovës dhe Universiteti “Kadri Zeka” për herë të parë kanë nënshkruar marrëveshje bashkëpunimi në fillim të majit të vitit 2015.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...