Presidenti i Izraelit, Isaac Herzo, ishte personi i parë që të premten mori dozën e tretë të vaksinës teksa shteti izraelit e nisi fushatën e përforcimit të imunitetit për personat e moshuar.
Gjatë së enjtes, kryeministri Naftali Bennet ka njoftuar se Izraeli do të ofrojë dozën e tretë për personat mbi moshën 60-vjeçare që tashmë janë plotësisht të vaksinuar.
Doza e tretë pritet që t’u ofrohet edhe grupmoshave të tjera. Vendimi e bën Izraelin shtetin e parë që e zbaton dozën përforcuese të vaksinave. Një veprim i tillë është ndërmarrë në kohën e ngritjes së rasteve të infektimit me koronavirus dhe të paralajmërimit se efektiviteti i vaksinave bie me kalimin e kohës.
Deri më tani as Shtetet e Bashkuara të Amerikës dhe as Bashkimi Evropian nuk kanë miratuar përdorimin e dozës shtesë për përforcimin e imunitetit.
Ende nuk ekzistojnë fakte se doza e tretë në të vërtetë e forcon imunitetin. Organizata Botërore e Shëndetësisë në fillim të muajit korrik kishte bërë të ditur se nuk ka fakte të mjaftueshme se doza e tretë është e domosdoshme.
Zyrtarët e OBSH-së u kanë bërë thirrje shteteve të pasura që të shpërndajnë vaksinat te shtetet e varfra që ende nuk kanë imunizuar qytetarët, në vend që t’i përdorin ato si përforcues të imunitetit.
