Rreth 200,000 persona në Tajlandë janë shtruar në spital këtë javë me probleme shëndetësore për shkak të ndotjes së ajrit, sipas autoriteteve shëndetësore. Më shumë se 1.3 milionë njerëz janë sëmurë që nga fillimi i vitit për shkak të ndotjes së ajrit, tha Ministria e Shëndetit Publik.
Kryeqyteti, Bangkok, me rreth 11 milionë banorë dhe një atraksion turistik nga e gjithë bota, po jeton në mjegull që nga fillimi i javës, gjë që ka bërë që popullsia të mbajë maska.
Smogu që mbulon horizontin është i lidhur me emetimet nga makinat dhe industritë, si dhe tymin nga djegia sezonale e bujqësisë që ndodh në këtë periudhë të vitit.
Një mjek nga Ministria e Shëndetit Publik u ka kërkuar banorëve të Bangkokut të mbajnë një maskë N95 kur dalin jashtë. Fëmijët, gratë shtatzëna dhe njerëzit me probleme të frymëmarrjes ose zemrës duhet gjithashtu të qëndrojnë në shtëpi, shtoi Khryangrai Namthaisong.
50 rrethet e Bangkokut kishin nivele të grimcave të imëta (PM 2.5), të cilat janë veçanërisht të rrezikshme pasi depërtojnë thellë në mushkëri, shumë mbi nivelet e alarmit të mërkurën.
Sot në mesditë në rajonin qendror të Pathumuan, një shërbim lokal i monitorimit të ndotjes së ajrit regjistroi 70 mikrogramë për metër kub në 24 orët e fundit. Ky numër tejkalon rekomandimin e Organizatës Botërore të Shëndetësisë (OBSH) prej 15.
Autoritetet e Administratës Metropolitane të Bangkok (BMA) kanë ngritur pika kontrolli për shkarkimin e makinave, tha zëdhënësi Ekvarunyu Amrapala.
