Presidenti kinez Xi Jinping mbërriti sot në Phnom Penh, ndalesa e fundit e një turneu që synon forcimin e marrëdhënieve të Pekinit me partnerët e tij në Azinë Juglindore përballë ofensivës doganore të Shteteve të Bashkuara.
Xi vizitoi fillimisht Vietnamin dhe më pas Malajzinë, në një kohë kur Kina përpiqet të balancojë rritjen e madhe të tarifave doganore të vendosura nga presidenti Donald Trump ndaj partnerëve tregtarë të SHBA-së.
Lideri kinez u ul në aeroportin e Phnom Penh ku u prit nga mbreti Norodom Sihamoni në një ceremoni ushtarake.
Pasdite, Xi Jinping do të shkojë në pallatin mbretëror, përpara se të takohet me ish-udhëheqësin Hun Sen dhe djalin e tij, kryeministrin Hun Manet, sipas dokumenteve zyrtare të siguruara nga Agjencia Franceze e Lajmeve (AFP).
Sipas një deklarate të publikuar sot nga faqja zyrtare e lajmeve të Kamboxhias Fresh News, Xi theksoi se Kina mbështet mbretërinë në “zgjedhjen e një rruge zhvillimi që i përshtatet kombit të saj, duke ruajtur sovranitetin kombëtar, pavarësinë dhe integritetin territorial.”
Ai shtoi se të dy vendet duhet “të kundërshtojnë me vendosmëri forcat e jashtme që ndërhyjnë në punët e brendshme, mbjellin përçarje dhe minojnë” marrëdhëniet – një nënkuptim i qartë ndaj luftës tregtare të nisur nga presidenti amerikan.
Kina, si partneri kryesor tregtar i Kamboxhias, është edhe investitori i huaj më i madh në vend dhe zotëron më shumë se një të tretën e borxhit të jashtëm të mbretërisë, që arrin në 11 miliardë dollarë, sipas Fondit Monetar Ndërkombëtar.
Phnom Penhi është gjithashtu një nga aleatët më të besueshëm të Pekinit në Azi. Hun Manet e përshkroi dje vizitën e Xi si një shenjë të një “miqësie të provuar”.
Në një video të publikuar dje, ai shpjegoi se të dy vendet ndajnë “interesa të përbashkëta të bazuara në parimet e respektit për sovranitetin, barazinë dhe mos-ndërhyrjen në punët e brendshme” dhe shtoi se Kina ka luajtur një “rol kyç” në zhvillimin socio-ekonomik të Kamboxhias.
Kina dhe Kamboxhia po festojnë 67 vjet marrëdhënie diplomatike dhe 50-vjetorin e marrjes së Phnom Penh nga Khmerët e Kuq – të mbështetur atëherë nga Pekini – më 17 prill 1975.
Në fillim të prillit, Donald Trump kishte njoftuar tarifa doganore prej 49% ndaj Kamboxhias, ndër më të lartat që ka vendosur ndonjëherë.
Vendi, i cili ka shumë fabrika të financuara nga kapitali kinez, pa që kjo tarifë, si në shumë vende të tjera përveç Kinës, të ulej në 10% për një periudhë prej 90 ditësh. Hun Manet i dërgoi një letër Shtëpisë së Bardhë për të konfirmuar “vullnetin e mirë të Kamboxhias për të negociuar një zgjidhje të përbashkët,” sipas Ministrisë së Tregtisë.
Pekini, i cili vazhdon të ndikohet nga tarifa 145% nga SHBA, e quajti këtë nivel “qesharak” dhe reagoi duke vendosur tarifa hakmarrëse prej 125% mbi produktet amerikane.
