Përplasjet në jug të Sirisë: Izraeli bombardoi forcat siriane për të “mbrojtur druzët”

Azia

Përplasjet në jug të Sirisë: Izraeli bombardoi forcat siriane për të “mbrojtur druzët”

Më: 15 korrik 2025 Në ora: 16:54
Foto ilustrim

Pas shpërthimit të luftimeve mes forcave qeveritare siriane dhe fraksioneve të armatosura druze që kontrollojnë qytetin e Sweidës, në një zhvillim të rrallë, Izraeli bombardoi forcat qeveritare siriane që po hynin në qytetin me shumicë druze në jug të Sirisë, duke i dalë në mbrojtje komunitetit.

Edhe pse më parë, udhëheqja e re e Sirisë ishte konsideruar nga Izraeli si një partner i mundshëm, ky ishte një sulm i drejtpërdrejtë. Megjithatë, ministri i Mbrojtjes së Sirisë, pak kohë më pas ka njoftuar për armëpushim.

Izraeli, që ka vetë një popullatë druze, ka tentuar të paraqitet si mbrojtës i komunitetit druz në Siri, duke i parë ata si aleatë të mundshëm.

Sipas The Times of Israel, kryeministri Benjamin Netanyahu dhe ministri i Mbrojtjes Israel Katz kanë deklaruar se kishin urdhëruar Forcat e Mbrojtjes së Izraelit të bombardonin forcat dhe armatimin sirian që po afroheshin me Sweidën “pas sulmit ndaj druzëve”.

Sulmet izraelite ndodhën ndërkohë që forcat siriane hynin në qytetin e Sweidës për të shtypur përplasjet vdekjeprurëse ndërkomunitare mes popullsisë shumicë druze dhe fiseve beduine, që sipas raporteve kanë lënë pothuajse 100 të vdekur.

comment Për komente lëvizni më poshtë
Sot mund të lexoni Shfletoni kopertinat