Presidenti i Koresë së Jugut, Lee Jae Myung, priti sot presidentin kinez Xi Jinping në takimin e tyre të pare, duke shënuar një rikthim të marrëdhënieve pas viteve të tensionuara për shkak të çështjeve tregtare dhe mosmarrëveshjeve kulturore.
Vizita e Xi është e para në Korenë e Jugut që nga viti 2014 dhe u zhvillua në kuadër të samitit të “APEC”-ut.
Lee e mirëpriti Xi-n me një ceremoni, përfshirë ushtarë të veshur me kostume tradicionale, dhe e paraqiti vizitën si një mundësi për të ndërtuar marrëdhënie “të ndërsjella dhe me përfitime reciproke”.
Ai gjithashtu theksoi rolin e Kinës si partner kryesor tregtar të Koresë së Jugut dhe si faktor stabiliteti në rajon, duke përmendur edhe këmbimet e fundit midis Kinës dhe Koresë së Veriut.
Xi, nga ana e tij, e përshkroi Korenë e Jugut si një fqinj të rëndësishëm dhe partner që nuk mund të ndahet nga Kina. Ai përdori këtë takim për të forcuar pozicionin e Kinës si një fuqi e përgjegjshme në rajon, veçanërisht pas largimit të Trump nga samiti dhe pas tensioneve të mëparshme tregtare mes Pekinit dhe Uashingtonit.
Presidenti jugkorean gjithashtu kërkoi bashkëpunimin e Kinës në përpjekjet për të rifilluar dialogun me Korenë e Veriut, duke theksuar rëndësinë e stabilitetit dhe marrëdhënieve të hapura për zgjidhjen e tensioneve në Gadishullin Korean.
Kjo vizitë dhe pjesëmarrja e Xi-t në samitin e “APEC”-ut nënvizojnë përpjekjet e Pekinit për të riforcuar lidhjet rajonale dhe për të marrë rolin e liderit në rajon, ndërkohë që SHBA-ja mbetet më pak e dukshme në samit.
