Vala e protestave antiqeveritare ka përfshirë tashmë të gjitha provincat e Iranit. Në disa prej tyre, qytetarët kanë nisur të kërkojnë kthimin e monarkisë, ndërsa autoritetet, në përpjekje për të kufizuar rrjedhën e informacionit, kanë urdhëruar ndërprerjen e internetit në të gjithë vendin.
Protestat po vazhdojnë të përhapen në mbarë Iranin dhe, sipas njoftimeve, bëhet fjalë për demonstratat më masive të paktën në katër vitet e fundit. Ato filluan si protesta lokale të tregtarëve, të pakënaqur me inflacionin e lartë dhe situatën e rëndë ekonomike, por brenda pak ditësh u shndërruan në një valë të gjerë protestash antiqeveritare në shkallë kombëtare.
Këto protesta po përshkruhen si sfida më e madhe për regjimin e Teheranit deri më tani. Për herë të parë pas disa dekadash, atyre u janë bashkuar edhe rajonet kurde të Iranit.
Protestuesit kanë marrë përkrahje të madhe nga diaspora iraniane, si dhe nga Reza Pahlavi, djali i Shahut të fundit të Iranit, Mohammad Reza Pahlavi. Reza Pahlavi, i cili u detyrua të largohej nga vendi pas Revolucionit Islamik, u ka bërë thirrje qytetarëve iranianë që t’u bashkohen protestave me synim rrëzimin e regjimit aktual. Në të paktën tri qytete të mëdha, protestuesit kanë kërkuar hapur rikthimin e monarkisë dhe kthimin e familjes Pahlavi në krye të vendit.
Mbështetje për protestuesit ka shprehur edhe një pjesë e bashkësisë ndërkombëtare, përfshirë presidentin amerikan Donald Trump.
Megjithëse konfirmimi i informacionit që vjen nga Irani është i vështirë, grupe të ndryshme raportojnë se deri më tani janë konfirmuar të paktën 21 civilë të vrarë gjatë protestave të ditëve të fundit, ndërsa mbi 2.500 persona janë arrestuar.
Në përpjekje për të kufizuar rrjedhën e informacionit, autoritetet iraniane kanë ndërprerë internetin në të gjithë vendin dhe kanë vendosur kufizime të rrepta për mediat që operojnë brenda Iranit.
