Bashkimi Kristian Demokrat (CDU) fitoi zgjedhjet e sotme në landin gjerman të Schleswig-Holstein, ndërsa SPD e kancelarit Olaf Scholz pësoi një humbje të rëndë.
Sipas rezultateve të para jo të plota, CDU, e udhëhequr nga kryeministri aktual rajonal Daniel Guenther, fitoi 42.6 për qind të votave ose 11.8 për qind më shumë se në zgjedhjet e fundit parlamentare në Schleswig-Holstein në vitin 2017.
Në nivel federal, SPD në pushtet pësoi një disfatë të rëndë në shtetin më verior federal, duke fituar vetëm 15.7 për qind, 11.8 për qind më pak nga zgjedhjet e fundit. E dyta në radhë është Partia e Gjelbër, e cila mori 4.3 për qind më shumë vota me 17.2 për qind pesë vjet më parë.
Liberalët, të cilët kanë qeverisur në koalicion me CDU dhe Të Gjelbërit si një partner më i vogël për pesë vjetët e fundit në Schleswig-Holstein, fituan 7 për qind, një rezultat pak më i ulët se në zgjedhjet e fundit.
Sipas analizave të para, suksesi i madh i CDU-së lidhet me popullaritetin e kryeministrit aktual Daniel Guenther. Në sondazhet e opinionit, qytetarët shprehën mendimin se Guenther Schleswig-Holstein e kishte kaluar krizën pandemike më mirë se kryeministrat e landeve të tjera federale.
SPD pësoi një disfatë historike në veri falë kandidatit relativisht të panjohur Thomas Losse-Mueller si dhe opinionit të qytetarëve se SPD ka humbur kompetencat e saj kur bëhet fjalë për çështje tradicionale socialdemokrate siç është drejtësia sociale.
Kryeministri kristian-demokrat Guenther tani ka mundësinë të udhëheqë një koalicion me vetëm një partner, dhe të dy partnerët aktualë të koalicionit të Gjelbërit dhe FDP dhe partia e pakicës SSW vijnë në konsideratë.
Zgjedhjet në Schleswig-Holstein janë një sinjal për zgjedhjet e javës së ardhshme në landin federal më të populluar të Gjermanisë, North Rhine-Westphalia, ku CDU është aktualisht në pushtet.
Për shkak të rëndësisë së këtij landi, zgjedhjet në Nordrhein-Westfalen njihen si "zgjedhje më të vogla federale" dhe janë treguesi më i rëndësishëm i popullaritetit të qeverisë së re federale socialdemokrate-gjelbër-liberale të udhëhequr nga kancelari Olaf Scholz.
