Ish-presidenti ukrainas nuk u lejua të largohej nga Ukraina për të marrë pjesë në një takim të një organi të NATO-s në Lituani, ka thënë fraksioni parlamentar i partisë së tij.
Petro Poroshenko u ndalua dy herë në një pikë kufitare me Poloninë, ndërsa po udhëtonte për në një takim të asamblesë parlamentare të NATO-s, ku do të takonte Presidentin e Lituanisë Gitanas Nauseda, thuhej në njoftim, raporton Sky news, përcjell "Bota sot".
Në një deklaratë grupi parlamentar tha: "Poroshenko kishte marrë të gjitha lejet formale për t'u larguar nga vendi dhe ishte përfshirë në delegacionin zyrtar të Parlamentit të Ukrainës për këtë ngjarje".
Mediat ukrainase raportuan se Poroshenko nuk mund të kalonte kufirin për shkak të "problemeve teknike" me një leje që e lejonte të largohej nga vendi.
Në janar, Poroshenko fitoi një vendim gjykate që e lejonte të qëndronte në liri ndërsa po hetohej për tradhti në një hetim që ai thotë se ishte një sulm i motivuar politikisht i lidhur me aleatët e pasardhësit të tij, presidentin Volodymyr Zelenskyy.
Ish-presidenti po hetohet në lidhje me financimin e separatistëve të mbështetur nga Rusia në lindje të vendit përmes shitjeve të paligjshme të qymyrit në 2014-15.
