LIVE: Britania e ashpër edhe ndaj këtij shtetit – I vendos sanksione/ Kryepeshkopi rus del kundër Putinit

Në fillim të këtij viti, një student më pyeti se si mendoja se do ta etiketonin historianët periudhën e historisë botërore, që ai besonte se sapo kishte nisur me pushtimin rus të Ukrainës. Nuk mund t’i rezistoja përgjigjes:“Nuk e kam idenë. Shpresoj që ata të mos e quajnë ‘periudha e paraluftës’”.

Por a jemi në fakt në fillimin e një periudhe të re në historinë botërore? Shumë historianë dhe analistë, kanë nxituar të thonë se po. Edhe para fillimit të pushtimit, kolumnisti i “Wall StreetJournal”, Xherard Bejkër, po mendonte se “kriza mbi Ukrainën… shënon fundin e epokës së pas Luftës së Ftohtë”. 

Dhe sapo forcat ruse kaluan kufirin ukrainas, Daniel S.Hemilton i Institutit Brukings ra dakord me të, duke shkruar:“Periudha e pas Luftës së Ftohtë ka përfunduar. Sapo ka nisur një epokë më fluide dhe përçarëse”. Disa ditë më vonë, politologu Shon Iling e cilësoi pushtimin rus “një ngjarje historike botërore”, duke shtuar se “efektet e tij ka të ngjarë të ndihen për shumë nga vitet e ardhshme”. 

Që të tre ishin të sigurt se një ditë historianët do të shkruanin kapituj të rinj në tekstet e tyre shkollore, duke e nisur pikërisht me vitin 2022. Por vetë historianët, nuk kanë pasur kurrë një mënyrë të vetme, të qartë dhe të dakordësuar, për ta ndarë historinë në segmente të veçanta. 

Lexo lajmin e plotë KËTU.

Lufta e Tretë Botërore mund të shpërthejë në një ishull suedez në Detin Baltik, i cili ndodhet në jug të Stokholmit dhe përballë Letonisë. Pak më e vogël sesa ishulli i Majorkës në Spanjë,  dhe me një popullsi prej vetëm 58.000 banorësh, Gotland konsiderohej më parë një atraksion turistik, një perlë e Evropës Veriore me dhjetëra plazhe të bardha dhe me qytetin historik Visbi, i rrethuar me mure mesjetare dhe nga rrënojat e lashta të një kishe, të cilat disa banorë vendas i krahasojnë me “kullën e Pizës”. 

Por kërcënimi në rritje nga Rusia, i simbolizuar nga pushtimi i Ukrainës dhe anëtarësimi i Suedisë në NATO, po e transformojnë këtë peizazh idilik skandinav në një “aeroplanmbajtëse të pathyeshme në Baltik”. Kështu e përkufizon një ushtar suedez, në raportimin e gjatë që ikushton  “Financial Times” Gotlandit, duke e cilësuar pikërisht si vendin nga ku mund të nisë një konflikt botëror midis Aleancës Atlantike dhe Moskës. 

Ekspertët e çështjeve ushtarake, të cituar nga gazeta britanike, thonë se nëse Putin vendos që të pushtojë njërinapo të gjitha shtetet baltike, tashmë që të gjitha anëtare të NATO-s, ka të ngjarë që ai të fillojë të zbarkojë pikërisht në këtë ishull që i përket Suedisë.

Analistët thonë se ka pak lokacione kryesore strategjike në të gjithë Evropën. Pasi kontrolli i Gotland nga ana e rusëve do të kërcënonte jo vetëm kryeqytetin suedez Stokholm, por edhe Estoninë, Letoninë dhe Lituaninë, duke bllokuar qarkullimin e anijeve në Baltik. 

Lexo lajmin e plotë KËTU.

Britania e Madhe ka njoftuar se nesër do të vendosë sanksione të reja ekonomike, tregtare dhe transporti kundër Bjellorusisë për shkak të mbështetjes së këtij vendi për sulmin e Rusisë ndaj Ukrainës.

Paketa e re e masave ndëshkuese do të përfshijë ndalimin e importit dhe eksportit të mallrave me vlerë rreth 60 milionë funte, duke përfshirë eksportin e produkteve të naftës, shitjen e komponentëve të teknologjisë së avancuar, eksportin e mallrave luksoze, si dhe importin e hekurit dhe çelikut.

Qeveria britanike do të ndalojë gjithashtu disa kompani bjelloruse të hyjnë në tregun e borxhit dhe të emetojnë letrat e tyre me vlerë në bursën e Londrës.

Britania ka rritur tashmë tarifat e importit për një sërë produktesh nga Bjellorusia me 35 pikë përqindjeje dhe ka sanksionuar presidentin bjellorus Alexander Lukashenko dhe zyrtarë të lartë të qeverisë.

Kryepeshkopi i rajonit perëndimor të Belgorodit të Rusisë ka bërë thirrje për t'i dhënë fund "gjakderdhjes në tokën ukrainase" - në një shfaqje të rrallë të kundërshtimit publik ndaj Kremlinit, përcjell Bota sot.

Vërejtjet e tij - të raportuara në mediat ruse - pasuan një seri sulmesh raketore në qytetet ruse të Belgorod dhe Kursk në kufirin e Ukrainës - për të cilat Moska ia ka fajësuar Kievit.

“Mbrëmë, raketa nga forcat e armatosura të Ukrainës goditën njerëzit e Belgorodit që flinin në zonat e banuara”, shkroi kryepeshkopi, në një deklaratë të postuar në faqen zyrtare të kishës.

"Midis të vdekurve ishin banorë të rajonit të Kharkivit [të Ukrainës] që erdhën për të kërkuar strehim nga lufta në Belgorod paqësor.

"Ne bëjmë thirrje për një lutje të veçantë për pushimin e të ndjerit dhe për shërimin e të plagosurve; për t'i dhënë fund gjakderdhjes që po ndodh në tokën ukrainase, por që sot ka arritur edhe në shtëpitë tona."

Gjatë një vizite në Kiev, kryeministri australian Anthony Albanese u zotua se vendi i tij do të ofrojë mbështetje shtesë për Ukrainën në luftën e saj kundër pushtimit rus.

Albanese tha më 3 korrik gjatë takimit me presidentin ukrainas Volodymyr Zelensky se ndihma e re ushtarake do të përfshijë 14 transportues të blinduar të personelit, 20 automjete të blinduara Bushmaster dhe një numër dronësh, me një vlerë totale prej rreth 100 milionë dollarë australianë (68 milionë dollarë amerikanë).

Zelenskiy tha se Australia po i jepte Ukrainës "ndihmë të konsiderueshme, në veçanti mbështetje të mbrojtjes", dhe se automjetet Bushmaster të prodhuara në Australi ishin "shumë të vlerësuara".

Bushmaster është projektuar kryesisht si një mjet transporti për trupa.

Albanese tha gjithashtu se Australia do të vendosë sanksione dhe ndalime udhëtimi për 16 ministra dhe oligarkë të tjerë rusë, duke e çuar në 843 numrin e përgjithshëm të rusëve të sanksionuar nga Australia.

Kjo ishte vizita e par ndonjëherë në Ukrainë nga një kryeministër australian./REL

Kremlini do të përgjigjet "në natyrë" pasi Bullgaria dëboi 70 diplomatë rusë, paralajmëroi sot ministri i jashtëm rus Sergei Lavrov, përcjell Bota sot.

Ajo vjen pasi kryeministri në largim i Bullgarisë Kiril Petkov njoftoi dëbimin e 70 stafit diplomatik rus për shqetësime spiunazhi javën e kaluar.

Masa, e cila pasoi një përkeqësim të mprehtë të lidhjeve për pushtimin rus të Ukrainës, ishte dëbimi më i madh ndonjëherë i diplomatëve rusë nga Sofja dhe më shumë se përgjysmoi madhësinë e gjurmës diplomatike të Moskës në Bullgari.

Pas vendimit, ambasadorja e Rusisë në Bullgari, Eleonora Mitrofanova, tha se do t'i kërkonte Moskës të mbyllte ambasadën e saj në vendin ballkanik pasi u injorua apeli i saj që Sofja të anulonte atë që ajo e quajti një hap armiqësor të paprecedentë.

Në një deklaratë drejtuar popullit bullgar, ambasadori tha se mbyllja e ambasadës ruse do të çonte në mënyrë të pashmangshme në mbylljen e ambasadës së Bullgarisë në Moskë.

Presidenti rus Vladimir Putin i ka uruar trupat ruse siç thotë ai për “çlirimin” e rajonit lindor të Ukrainës, Luhansk, në Donbas.

Në një takim televiziv me ministrin e Mbrojtjes, Sergei Shoigu, Putin tha se trupat e përfshira në operacion duhet të pushojnë, por njësitë e tjera ushtarake duhet të vazhdojnë luftimin.

Putin u ka dhënë gjithashtu titullin “Hero i Rusisë” dy gjeneralëve pas pushtimit të rajonit.

Rusia njoftoi të dielën se tani kontrollon të gjithë rajonin e Luhanskut, pasi pushtoi qytetin me rëndësi strategjike të Lysychansk.

Moska ka thënë se “operacioni i saj special ushtarak”, siç e quan pushtimi i Ukrainës, ka për qëllim “çlirimin” e Ukrainës lindore nga “nacionalistët”. Rajoni lindor ka qenë fokusi i aksionit të tij ushtarak pasi përpjekjet fillestare për të marrë kontrollin e kryeqytetit Kiev dështuan, shkruan BBC.

“Do të përpiqemi të relaksohemi sa më shumë që të jetë e mundur”, teksa në lindje të Ukrainës luftohet egërsisht me pushtuesit rusë, shumë banorë të Kievit tentojnë t`i rikthehen normalitetit, duke përfshirë këtu edhe pushimet verore.

Kjo periudhë e vitit, e gjente zakonisht Ivan Sukhanov dhe familjen e tij në brigjet e Detit të Zi. Këtë vit, nuk do të shkojnë më larg se brigjet e lumit Dnjepër, por pa pushime nuk do të mbeten.

“Këtë vit, kishim planifikuar të shkonim në Detin e Zi e më pas, të kalonim edhe ca ditë jashtë kufijve, në Turqi ose Egjipt, të bënim diçka interesante në mënyrë që djali ynë të shihte piramidat e Egjiptit, të prekte nga afër një kulturë tjetër. Këto ishin planet, por nuk dolën ashtu siç e mendonim. Tani do të qëndrojmë këtu në Kiev, e në rrethinat e tij. Në liqene, parqe. Në pyje nuk shkojmë shumë se nuk ka siguri. Por duam të qetësohemi sa më shumë që të mundemi”, tha Ivan Sukhanov, inxhinier nga Kievi.

“Zakonisht, në verë shkonim në Krime, sepse ne nga Krimea jemi. Por tani edhe ajo rrugë është bërë mjaft e vështirë që prej aneksimit të Rusisë; na e morën dhe nuk shkojmë dot më për pushime”, tha Vera Sapyga, refugjate nga Krimea.

Në kryeqytetin ukrainas, ka mjaft plazhe me rërë, që zakonisht janë të tejmbushur me njerëz në muajt e nxehtë të verës.

Por në fundjavën e parë të korrikut, pavarësisht temperaturave të larta, ato nuk gëlonin më si dikur, teksa pavarësisht dëshirës për normalitet, frika e luftës është gjithmonë e pranishme në jetët e banoreve, edhe pse sirenat e alarmit nuk gjëmojnë më në Kiev.

Derisa forcat ruse goditën Mariupolin me artileri të rëndë, duke e kthyer qytetin në gërmadha, Anastasia u largua nga qyteti ukrainas me djalin e saj drejt destinacionit të vetëm që dukej i mundur për ta arritur: Rusinë.

Me pak para në dorë, ajo priste me padurim të merrte pagesën prej 10,000 rublash (185 dollarë) që presidenti rus Vladimir Putin u kishte premtuar refugjatëve ukrainas edhe para se të fillonte një pushtim në shkallë të gjerë të vendit më 24 shkurt.

Paratë do ta ndihmonin atë të mbulonte nevojat themelore të saj dhe të djalit të saj për një periudhë të shkurtër kohore, derisa po strehohej në Shën Petersburg, duke pritur që lufta të mbarojë.

Tre muaj pas mbërritjes atje, ajo ende nuk e ka marrë pagesën.

"Punëtorët në qendrën e qeverisjes lokale që trajtojnë çështje të tilla "thanë se nuk dinin asgjë", tha Anastasia.

Ashtu si refugjatët e tjerë, me të cilët RFE/RL foli për këtë histori, ajo nuk donte që mbiemri i saj të publikohej nga frika e pasojave.

"[Ata thanë], prit, në një moment ata do t'ju japin", ajo tha.

Anastasia nuk është aspak e vetme në ankesën e saj.

Svetlana Tikhomirova, një gazetare e Shën Petersburgut, e cila është vullnetare për të ndihmuar refugjatët ukrainas, tha se kohët e fundit rreth 90 për qind e atyre që kanë mbërritur në rajonin e Leningradit – i cili rrethon qytetin e Shën Petersburgut, por nuk e përfshin atë – ende nuk e kanë marrë pagesën e tyre të premtuar.

Në një letër drejtuar Putinit në mes të qershorit dhe të publikuar në rrjete sociale, Tikhomirova tha se refugjatët ukrainas në Rusi janë kapur në një rreth vicioz.

Pa pagesën, shumë prej tyre nuk kanë para të mjaftueshme për të paguar për shërbimet – siç janë përkthimet e dokumenteve – kritike për marrjen e pasaportës ruse dhe gjetjen e ndonjë pune.

Tikhomirova është një nga qindra njerëzit përreth Rusisë që ndihmon refugjatët ukrainas me para, ushqime dhe gjëra të tjera thelbësore.

Vullnetarët, si dhe refugjatët, kanë krijuar bisedat e tyre në rrjete sociale për të ndarë përditësimet dhe shqetësimet, një prej të cilave është vonesa e pagesës.

"Situata në [Rusinë provinciale] është shumë më e rëndë sesa në Moskë dhe Shën Petersburg, sipas asaj që thonë vullnetarët", shkroi ajo në letër, duke shtuar se në zona më të largëta "vullnetarët vetë nuk janë në gjendje të ofrojnë mbështetje për refugjatët për shkak të standardeve më të ulëta të jetesës – njerëzit janë të uritur në kuptimin e drejtpërdrejtë të fjalës”.

Kur u kontaktua nga Radio Evropa e Lirë, Tikhomirova nuk pranoi të komentonte letrën.

Kolegu i saj, Galina Artemenko, tha në një postim në Telegram se situata është "pikërisht" siç përshkruhet në letër.

Komentet e tyre duket se janë në kundërshtim me Ministrinë e Situatave Emergjente të Rusisë, e cila i mbikëqyrë pagesat për refugjatët.

Një zyrtar i paidentifikuar i ministrisë i tha medias shtetërore më 7 qershor se 301,510 refugjatë ukrainas – ose gati katër nga pesë prej atyre që zyrtari tha se aplikuan – kishin marrë pagesën prej 10,000 rublash.

Ka rreth 1.3 milion refugjatë ukrainas në Rusi, sipas OKB-së, ndërsa Qeveria ruse e ka vendosur numrin në 2.1 milionë, duke përfshirë 340,000 fëmijë. Kievi ka akuzuar Moskën se ka marrë me forcë qytetarët ukrainas në Rusi.

Shumica e refugjatëve ukrainas janë pensionistë të dobët financiarisht dhe gra me fëmijë, pjesërisht për shkak se shumë nga burrat në pjesët e rajonit të Donbasit të Ukrainës që mbaheshin nga separatistët e mbështetur nga Rusia shumë kohë përpara pushtimit të shkurtit kanë qëndruar – me dëshirë ose jo – për të luftuar.

Një ekspert i tha Radios Evropa e Lirë se burokracitë dhe përplasjet burokratike mund të shuanin shpresën. Për Natalia Yurchenkon, e cila iku nga Gadishulli i Krimesë me burrin e saj, kjo tashmë ka ndodhur.

Ata kanë pritur tre muaj për t'u ardhur pagesa.

“Familja jonë nuk shpreson më në pagesën e premtuar”, tha ajo për Radion Evropa e Lirë. “Ne kishim shumë nevojë për para. Nuk kishim asgjë për të jetuar dhe na u desh të shisnim disa nga gjërat tona”.

Një pagesë prej 10,000 rublash në çdo rast nuk do të zgjaste shumë në qytetet më të mëdha të Rusisë. Përdorimi i sistemit të metrosë së Moskës do të hante një të katërtën e asaj sasie në një muaj.

Një nga pohimet që Putini ka përdorur për të justifikuar pushtimin e paprovokuar të Ukrainës është se rusishtfolësit në Donbas kishin nevojë për mbrojtje nga Qeveria në Kiev, për të cilën ai ka pretenduar se po kryente gjenocid atje.

Ofensiva ruse ka shkatërruar një pjesë të madhe të Donbasit, duke lënë shumë nga rusishtfolësit që i mbijetuan sulmit pa shtëpi, pasuri apo punë.

Gjashtë ditë para pushtimit të 24 shkurtit, Putin urdhëroi Qeverinë e tij që t'i paguante çdo refugjati nga Donbasi 10,000 rubla për t'i ndihmuar ata "të vendoseshin në një vend të ri [dhe] të blinin të gjitha sendet e nevojshme për momentin".

Qeveria ruse ndau 5 miliardë rubla para fillimit të luftës për refugjatët, duke nënkuptuar se parashikonte deri në 500,000 refugjatë.

Dështimi i Rusisë për të bërë pagesat në kohë, pavarësisht përgatitjes së hershme, mund të pasqyrojë pritjet e Kremlinit për një luftë të shpejtë dhe fitimtare që do të gjeneronte shumë më pak refugjatë. Mund të jetë, gjithashtu, një reflektim i një burokracie famëkeqe të pafuqishme.

Në një takim në fillim të majit me 147 refugjatë që qëndronin në Mechta, një kamp për fëmijë jashtë Moskës, Nina Ostanina, një ligjvënëse e Partisë Komuniste në dhomën e ulët të Parlamentit të Rusisë, Duma e Shtetit, tha se do të ndërhynte në emër të tyre pasi mësoi se vetëm 32 persona kishin marrë pagesat e tyre.

Ostanina i tha grupit se pasi ajo ngriti për herë të parë çështjen në Duma, Ministria e Punës u urdhërua të ndihmonte Ministrinë e Emergjencave në përpunimin e aplikacioneve dhe shpërndarjen e parave, "por ende asgjë nuk ka ndryshuar".

Ajo tha se lista e refugjatëve nga Mechta ende në pritje të pagesës ishte dërguar tek autoritetet përkatëse "por gjithçka u zvarrit përsëri atje".

"Sa kohë mund të flasim për këtë?" tha ajo e zemëruar.

Për ata që nuk kanë politikanë në krah, procesi i arritjes së zyrtarëve në burokraci mund të jetë i frikshëm.

Alyona mbërriti në Shën Petersburg në fillim të majit nga rajoni i Luhanskut në Donbas dhe i thanë se do të paguhej 10,000 rubla brenda 10 ditëve. Dy muaj më vonë, ajo ende nuk e ka marrë atë pagesë.

Ajo tha se telefonoi qendrën lokale që trajtonte shpërndarjen e fondeve për të mësuar se kur do të paguhej dhe i thanë që të telefononte pas 15 minutash.

“Unë kam ditë që telefonoj, por askush nuk e merr telefonin,” tha ajo.

Refugjatët ukrainas në rajone të tjera, duke përfshirë Moskën, si dhe Krasnodarin dhe Rostovin në jug të Rusisë, i thanë Radios Evropa e Lirë se edhe ata kanë pritur me muaj për pagesat e tyre.

Olena, e cila mbërriti në rajonin e Moskës nga Mariupoli me vajzën dhe nënën e saj, tha se edhe ajo nuk ka marrë ende pagesën e saj prej 10,000 rublash, pavarësisht se ka paraqitur kërkesën e saj në prill.

Ajo tha se i është dashur të vrapojë nëpër Moskë për të mbledhur dokumente dhe për të vizituar mjekët, ndonjëherë duke qëndruar gjatë gjithë ditës në radhë.

“Nëse ju [Rusia] jeni pala pranuese [për refugjatët], atëherë na pranoni në një mënyrë normale,” tha ajo për Radion Evropa e Lirë. "Silluni në mënyrë njerëzore ndaj njerëzve që u ulën për një kohë të gjatë në të ftohtë, të uritur dhe nën bombardime dhe që u detyruan të gatuanin ushqim mbi një zjarr të hapur".

Svetlana Gannushkina, kreu i Asistencës Civile, një grup i të drejtave me bazë në Moskë që ndihmon migrantët dhe refugjatët, i tha Radios Evropa e Lirë se "procedurat e gjata burokratike" janë në qendër të problemit me të cilin përballen refugjatët ukrainas.

Ata duhet të dorëzojnë dokumente, të tilla si pasaporta e tyre, dhe të kalojnë një kontroll përpara se të mund të marrin pagesën e tyre dhe të kërkojnë një punë, tha ajo.

Një grua e moshuar në Mechta i tha Ostaninës se asaj i ishte refuzuar pagesa prej 10,000 rublash sepse nuk e kaloi kontrollin për arsye që nuk iu shpjeguan.

Megjithatë, atyre mund t'u kërkohet të udhëtojnë në një rajon tjetër ose të përballen me pengesa të tjera që u marrin kohë dhe energji, tha Gannushkina.

“Njerëzit shpenzojnë kaq shumë kohë [duke u marrë me burokracinë] dhe nuk është e qartë se si pritet të mbijetojnë ndërkohë. Me pak fjalë, ata humbasin shpresën”, tha ajo.

Marias, e cila u largua nga Donbasi për në Krasnodar, i thanë nga zyra e qeverisjes lokale se ajo dhe rastet e tjera të pagesave të vonuara po transferoheshin në rajonin fqinj të Rostovit.

"Unë as nuk e di se cilën zyrë qeveritare të kërkoj në Rostov", tha ajo.

Maria tha se pa para nuk mund të kryejë kontrollin mjekësor të nevojshëm për të gjetur punë.

Gannushkina tha se rreth 3,300 refugjatë i janë drejtuar Ndihmës Civile për ndihmë dhe se "shumë pak" kanë marrë pagesën prej 10,000 rublash.

“Sigurisht, janë para shumë të rëndësishme për këta njerëz dhe është e rëndësishme që ata t'i marrin ato menjëherë,” tha ajo.

Ganushkina tha se një tjetër pengesë për refugjatët janë kufizimet në konvertimin e hryvnyas ukrainase në rubla ruse dhe gjetjen e punës.

Refugjatët nuk mund të konvertojnë hryvnya në rubla derisa të kenë përfunduar kontrollin e historisë dhe të miratohen për pagesën.

Megjithatë, refugjatët mund të konvertojnë zyrtarisht vetëm deri në 8,000 hryvnya (275 dollarë).

Dy kufizimet ndikojnë në aftësinë e refugjatëve për të blerë mallra thelbësore pas mbërritjes në Rusi, megjithëse ata gjithashtu mund t'i drejtohen tregut të zi për këmbim valutor.

"Ku është logjika këtu?", tha Ganushkina, duke shprehur zhgënjimin./REL

Liderët nga dhjetëra shtete dhe organizata ndërkombëtare do të takohen më 4 korrik në Lugano të Zvicrës, në takimin që ka për qëllim të hartojë një udhërrëfyes për rindërtimin e Ukrainës, teksa Rusia po intensifikon sulmet e saj.

Në takimin dyditor në Lugano pritet të marrë pjesë edhe kryeministri ukrainas, Denys Shmyhal, dhe presidentja e Komisionit Evropian, Ursula von der Leyen.

Presidenti ukrainas, Volodymyr Zelensky, i cili do të marrë pjesë virtualisht në këtë takim, ka paralajmëruar se puna që i pret vetëm në zonat që tashmë i kanë çliruar, është “vërtetë kolosale”.

“Është e nevojshme jo vetëm që të riparojmë gjithçka që pushtuesit kanë shkatërruar, por po ashtu të krijojmë një themel të ri për jetën tonë: të sigurt, modern, të rehatshëm dhe të arritshëm”, tha ai gjatë një adresimi më 3 korrik.

“Pavarësisht se sa e vështirë mund të jetë për ne sot, ne duhet të kujtojmë se na pret e nesërmja”, theksoi Zelensky.

“Ukraina është një shtet i madh dhe ka pasur shumë shkatërrim... nuk mund ta nisni planifikimin dhe koordinimin për rindërtim aq shpejt sa kërkohet”, tha për Dpa, Markus Berndt, kreu i departamentit për aktivitete të jashtme në Bankën Evropian për Investime.

Sipas tij, Ukraina ka nevojë për ndihmë urgjente që të sigurohet se shërbimet bazike, siç janë furnizimet me ujë, rrjet të kanalizimit, qasje në internet dhe të sigurohet se ka stabilitet makroekonomik.

Ambasadori zviceran që është përgjegjës për konferencën, Simon Pidoux, tha se është herët të vlerësohen të gjitha nevojat e Ukrainës, por insistoi se takimi në Lugano duhet të ofrojë një “busull” për punën që duhet të bëhet në të ardhmen.

“Mendoj se përpjekja [për rindërtim] do të zgjasë me vite, në mos dekada”, tha ai.

Qindra miliarda euro do të kërkohen për të financuar rindërtimin e infrastrukturës së shkatërruar të Ukrainës.

Konferenca ishte planifikuar që të mbahej para se Rusia të niste pushtimin në shkallë të gjerë më 24 shkurt dhe fillimisht ishte paraparë që në këtë konferencë të diskutohej për reformat në Ukrainë, por më pas qëllimi u ndryshua dhe takimi tani do të përqendrohet në rindërtimin pas luftës.

Konferenca pritet të përmbyllet me një deklaratë të përbashkët: Deklaratën e Luganos./REL