Ministri i Jashtëm i Italisë, Antonio Tajani, ka porositur mbrëmë se vendi i tij në të ardhmen nuk do ta furnizojë Kievin me armë ofensive.
Ushtria ukrainase në të ardhmen nuk mund të llogaritë më në dërgesat e armëve ofensive nga Italia.
“Situata në Ukrainë është e rëndë dhe jemi të brengosur për këtë. Po bëjmë përpjekje për paqe dhe sipas vendimit të Parlamentit, jemi të gatshëm të dërgojmë armë mbrojtëse”, shtoi Tajani.
Ai theksoi se Italia kurrë nuk do të dërgojë armë ofensive, pasi nuk është në luftë më Rusinë dhe nuk ka asgjë kundër popullit rus.
“Ne thjesht po mbrojmë pavarësinë e Ukrainës”, shtoi Tajani për televizionin italian RAI.
Parlamenti italian miratoi në mars të vitit të kaluar rezolutën për ta ndihmuar Ukrainën, përfshirë ndihmën ushtarake.
E qeveria e re që udhëhiqet nga e djathta në Itali, që erdhi në pushtet në tetor, ka zgjatur tashmë ndihmën ushtarake për këtë vit.
Aktualisht është në fuqi dekreti i gjashtë për ndihmën ushtarake sa i përket armatosjes së Ukrainës.
Sipas mediave italiane, lista e armëve mund të përfshijë raketat “Aspide” dhe sistemin e mbrojtjes kundërajrore SAMP-T, që do t’i dërgohen Ukrainës sipas marrëveshjes me Francën.
Nga fillimi i luftës ruse në Ukrainë, Italia ka dërguar Kievin armë në vlerë prej miliardë euro.
