​Beteja për Kanalin e Panamasë përshkallëzohet shkaku i Kinës

Bota

​Beteja për Kanalin e Panamasë përshkallëzohet shkaku i Kinës

Më: 27 prill 2025 Në ora: 14:55
Foto ilustrim

Rregullatori kryesor kinez i tregut njoftoi sot, se ata po monitorojnë nga afër shitjen e planifikuar të shumicës së aktiviteteve portuale të CK Hutchison te një konsorcium i udhëhequr nga BlackRock dhe theksoi se palët e përfshira në marrëveshje nuk duhet të përpiqen të anashkalojnë kontrollet antitrust.

Shitja nga konglomerati i Hong Kongut, i cili përfshin dy porte përgjatë Kanalit të rëndësishëm strategjik të Panamasë, është bërë shumë i politizuar në mes të rritjes së tensioneve tregtare midis Shteteve të Bashkuara dhe Kinës.

“Pa miratim nuk lejohet të kryhet përqendrimi i kompanive, përndryshe do të pësojnë pasoja juridike”, thuhet në njoftimin e Administratës Shtetërore për Rregullimin e Tregut.

Deklarata është në përgjigje të një artikulli të Wall Street Journal, sipas të cilit perandoria e anijeve MSC, e cila është pjesë e një konsorciumi të udhëhequr nga BlackRock, ka zhvilluar bisedime për të vazhduar zbatimin e pjesës më të madhe të marrëveshjes derisa të zgjidhen mosmarrëveshjet mbi dy porte në Panama.

Marrëveshja përbëhet nga dy komponentë me struktura të ndryshme pronësie – njëra lidhet me portet në Panama dhe tjetra me portet e tjera, transmeton KosovaPress.

Presidenti i SHBA-së Donald Trump ka deklaruar vazhdimisht se dëshiron të "merr përsëri kontrollin" e Kanalit të Panamasë dhe e ka përshkruar këtë marrëveshje si "rimarrje" e rrugës ujore. Media shtetërore kineze, megjithatë, kritikoi ashpër shitjen e planifikuar, duke e quajtur atë një tradhti të interesave kineze.

Trump theksoi të shtunën se anijet ushtarake dhe tregtare amerikane duhet të kenë të drejtën e kalimit të lirë përmes Kanaleve të Panamasë dhe Suezit.

Ndryshe, CK Hutchison, një kompani në pronësi të magnatit Li Ka-shing, njoftoi muajin e kaluar se do të shesë 80 për qind të aksioneve të saj në biznes, i cili përfshin 43 porte në 23 vende. Vlera e të gjithë biznesit, duke përfshirë borxhin, është 22.8 miliardë dollarë.

Burimet thanë se PSA International e Singaporit, pronari i 20 përqindëshit të mbetur të aksioneve, po konsideron gjithashtu shitjen e aksioneve të saj. Marrë në tërësi, konglomerati i Hong Kongut ka interesa në 53 porte, me portet në Hong Kong dhe Kinën kontinentale që nuk përfshihen në këtë transaksion.

comment Për komente lëvizni më poshtë
Sot mund të lexoni Shfletoni kopertinat