Ministri i Jashtëm i Rusisë Sergei Lavrov, ka paralajmëruar për hakmarrje nëse Britania vendos sanksione për krizën në Ukrainë.
Lavrov e bëri këtë kërcënim pas një takimi të tensionuar javën e kaluar me homologen e tij në Mbretërinë e Bashkuar Liz Truss, në një përpjekje për të shmangur luftën në rajon, raporton Metro, përcjell Bota sot.
Kryeministri britanik Boris Johnson, ka thënë se një paketë ‘shumë, shumë e ashpër’ sanksionesh është ‘gati për të shkuar’ nëse Rusia ndërmerr veprime ushtarake kundër Ukrainës.
Rreth 150,000 trupa ruse janë vendosur në kufi, duke nxitur frikën se një pushtim ndaj Ukrainës do të ndodhë.
Rusia ka mohuar vazhdimisht planet për sulm, por ka kërkuar garanci ligjërisht të detyrueshme që Ukraina nuk do të lejohet kurrë të bashkohet me NATO-n, gjë që Moska mendon se është zgjeruar shumë në lindje.
Perëndimi deri më tani ka refuzuar të bëjë premtime të tilla, me Johnson duke thënë se Ukraina ka çdo të drejtë të krijojë aleancat e saj mbrojtëse.
Duke paralajmëruar paketën e tij të sanksioneve në rast të një pushtimi 'të pamatur', Johnson tha: ''Ajo që po bëjmë është të shënjestrojmë banka të veçanta ruse, kompani ruse dhe të sigurohemi që të marrim hapa, të ndërmarrim edhe më shumë hapa, për të zhveshur fasadën e pronave ruse… qoftë në Londër apo gjetkë".
Ministrat fituan kompetenca të reja javën e kaluar për të vendosur këto sanksione, por Lavrov tha se nëse masa të tilla zbatohen, Rusia do të kundërpërgjigjet.
Ai tha: "Do të jetë e nevojshme të miratohet legjislacioni përkatës kundër atyre që po përpiqen të ndërtojnë një karrierë - për të rritur vlerësimet dhe për të fituar popullaritet duke përdorur ndjenjat rusofobike".
Pretendimet e djeshme të Rusisë se ajo po tërhiqte disa trupa pas përfundimit të stërvitjeve ushtarake, kanë sjellë skepticizëm.
Sekretari i Mbrojtjes i Mbretërisë së Bashkuar, Ben Wallace, i tha Sky News: “Ajo që nuk kemi parë është dëshmia e tërheqjes që është pretenduar nga Kremlini. Derisa të shohim një de-përshkallëzimin e duhur, të gjithë duhet të jemi të kujdesshëm në lidhje me drejtimin e udhëtimit nga Kremlini".
Ministria ruse e mbrojtjes publikoi një video që tregon një ngarkesë treni me automjete të blinduara duke kaluar një urë larg Krimesë, të cilën Rusia e aneksoi nga Ukraina në vitin 2014.
Ajo tha se kjo ishte pjesë e një kthimi të forcave në bazat e tyre të përhershme. Por sekretari i përgjithshëm i NATO-s, Jens Stoltenberg, kërkoi gjithashtu kujdes.
Ai tha: “Ne kemi dëgjuar shenjat nga Moska për gatishmërinë për të vazhduar përpjekjet diplomatike. Por deri më tani nuk kemi parë ndonjë de-përshkallëzimi në terren. Përkundrazi, duket se Rusia vazhdon ngritjen e saj ushtarake."/Botasot
