Republikat Popullore të Donetskut dhe Luhanskut shpallën pavarësinë e tyre në vitin 2014 – menjëherë pasi Rusia aneksoi gadishullin jugor të Krimesë të Ukrainës, transmeton BBC, transmeton "Bota sot".
Ukraina dhe aleatët e saj perëndimorë kanë akuzuar vazhdimisht Rusinë për nxitjen e trazirave dhe dërgimin e armëve për rebelët, të cilët tani kontrollojnë zona të mëdha të rajonit të njohur si Donbas.
Mirëpo, Moska gjithmonë i ka mohuar këto akuza.
Në 2014-15 u nënshkruan marrëveshjet e paqes - por ato nuk arritën t’i ndalojnë plotësisht luftimet. Në ditët e fundit ka pasur një rritje të dukshme të granatimeve.
Qindra mijëra njerëz janë larguar nga zonat e kontrolluara nga rebelët, por mendohet se rreth katër milionë njerëz ende jetojnë atje. Rreth 14,000 njerëz - përfshirë shumë civilë - kanë vdekur që nga viti 2014.