Ka pasur të paktën 73 persona të vrarë dhe 52 të plagosur në 136 sulme në objektet e kujdesit shëndetësor në Ukrainë që nga fillimi i pushtimit, tha të hënën gjatë një konference për shtyp Stéphane Dujarric, zëdhënës i Sekretarit të Përgjithshëm të OKB-së Antonio Guterres, shkruan CNN, transmeton Bota sot.
Dujarric tha se ai po citonte numrat e fundit nga Organizata Botërore e Shëndetësisë, një agjenci e OKB-së përgjegjëse për shëndetin publik ndërkombëtar.
Ai shtoi se sulmet ndaj objekteve të kujdesit shëndetësor në Ukrainë aktualisht përbëjnë më shumë se 68% të të gjitha sulmeve ndaj objekteve të kujdesit shëndetësor në mbarë botën që nga fillimi i vitit.
Për më tepër, më shumë se një në katër persona në Ukrainë (që përfshin rreth 12 milionë njerëz) janë zhvendosur për shkak të luftës, duke përfshirë rreth 4.9 milionë refugjatë dhe 7.1 milionë njerëz të zhvendosur brenda Ukrainës, tha Dujarric.
OKB-ja tani ka më shumë se 1,300 staf në terren në Ukrainë, duke punuar në tetë qendra operacionale në të gjithë vendin, tha zëdhënësi. Dujarric shtoi se Sekretari i Përgjithshëm Guterres vazhdon të jetë “thellësisht i shqetësuar” për sulmet e vazhdueshme në Ukrainë, duke rezultuar në viktima civile dhe dëmtime të infrastrukturës.
