Qeveria gjermane miratoi përgjysmimin e kuotës për punëtorët nga Ballkani

Gjermani

Qeveria gjermane miratoi përgjysmimin e kuotës për punëtorët nga Ballkani

Më: 4 nëntor 2026 Në ora: 13:08
Kabineti gjerman gjatë një mbledhjeje në Berlin.

Qeveria gjermane ka ndërmarrë një hap drejt uljes së numrit të punëtorëve që mund të punësohen në Gjermani përmes rregullores së posaçme për Ballkanin Perëndimor.

Kabineti gjerman miratoi më 4 nëntor 2026 projekt-rregulloren që parashikon përgjysmimin e kuotës vjetore nga 50.000 në 25.000 miratime, duke filluar nga 1 janari 2027.

Ndryshimi ende nuk ka hyrë në fuqi. Që rregullorja të zbatohet, ajo duhet të miratohet edhe nga Bundesrati, dhoma që përfaqëson landet gjermane.

Rregullorja e Ballkanit Perëndimor zbatohet për shtetasit e Kosovës, Shqipërisë, Maqedonisë së Veriut, Bosnjës dhe Hercegovinës, Malit të Zi dhe Serbisë. Ajo u mundëson të kërkojnë punësim në Gjermani edhe pa njohje formale të kualifikimit profesional, me përjashtim të profesioneve të rregulluara, si ai i mjekut.

Për të përfituar nga kjo rrugë, aplikuesi duhet të ketë një kontratë ose ofertë të detyrueshme pune dhe të plotësojë kushtet e tjera për vizë. Kushtet e punës dhe paga duhet të jenë të krahasueshme me ato të punonjësve të tjerë në Gjermani.

Kuota aktuale prej 50.000 miratimesh në vit vlen për të gjashtë shtetet së bashku. Ajo ndahet sipas muajve dhe shtetësive, ndërsa kërkesat mund të shqyrtohen për aq kohë sa kuota përkatëse nuk është shteruar.

Plani i qeverisë ka ngjallur kundërshtime nga përfaqësues të ekonomisë dhe nga Agjencia Federale e Punës. Ata kanë paralajmëruar se ulja e kuotës mund t’ua vështirësojë ndërmarrjeve gjetjen e punëtorëve, veçanërisht në ndërtim, gastronomi dhe sektorë të tjerë.

Përgjysmimi, nëse miratohet edhe nga Bundesrati, mund të kufizojë mundësitë e aplikuesve të rinj nga Kosova dhe Shqipëria që synojnë të punësohen përmes kësaj rregulloreje. Për kategori të caktuara punëtorësh mbeten të hapura edhe rrugë të tjera ligjore punësimi.

comment Për komente lëvizni më poshtë
Sot mund të lexoni Shfletoni kopertinat