Teoria në aplikacion, provim më i shkurtër dhe çmimet e autoshkollave të publikuara në internet
Parlamenti gjerman voton sot reformën e madhe të patentës së shoferit. Votimi pritet rreth orës 15:15. Reforma u premton familjeve kursime prej qindra eurosh.
Sipas Ministrisë së Transportit, patenta e kategorisë B kushton aktualisht mesatarisht rreth 3.400 euro. Ministri Steffen Bilger (CDU) thotë se kandidatët mund të kursejnë disa qindra euro, dhe në rastin më të mirë deri në 1.000 euro. Edhe klubi i automobilistëve ADAC vlerëson se kostoja mund të bjerë deri në një të tretën. Shoqatat e instruktorëve të autoshkollave e konsiderojnë shifrën prej 1.000 eurosh joreale.
Ndryshimet kryesore:
Teoria: kandidatët mund të zgjedhin mes mësimit me aplikacion nga shtëpia, mësimit hibrid dhe mësimit në klasë. Katalogu i pyetjeve për provim shkurtohet ndjeshëm.
Orët speciale: hiqet detyrimi për 12 orë fikse jashtë qytetit, në autostradë dhe natën. Numri caktohet sipas aftësive të kandidatit dhe vlerësimit të instruktorit.
Provimi praktik: kohëzgjatja ulet nga 55 në 40 minuta, ndërsa koha minimale e vozitjes nga 30 në 25 minuta.
Transparencë: çmimet dhe përqindja e kalueshmërisë së autoshkollave do të publikohen në një bazë të dhënash online.
Ushtrimi me familjarin: pas provimit teorik dhe gjashtë orëve mësimi, kandidati mund të ushtrojë edhe me një të afërm të kualifikuar. Këtë mundësi duhet ta miratojë veçmas secili nga 16 landet.
Reforma pritet të hyjë në fuqi kryesisht më 1 korrik 2027, që autoshkollat të kenë kohë për t’u përshtatur. Pjesa e dytë, që është rregullore, duhet të miratohet edhe nga Bundesrati.
Për familjet shqiptare në Gjermani me fëmijë që i afrohen moshës së patentës, ndryshimi mund të ketë rëndësi të drejtpërdrejtë financiare.