Hyseni: Kemi bërë të gjitha përgatitjet për vitin e ri shkollor

Gjilani

Hyseni: Kemi bërë të gjitha përgatitjet për vitin e ri shkollor

Më: 31 gusht 2022 Në ora: 10:21
Alban Hyseni

Kur po bëhen gati një javë prej kur ka nisur greva në sektorin publik, ku janë të përfshirë edhe mësimdhënësit, në komunën e Gjilanit thonë se kanë bërë të gjitha përgatitjet për të nisur vitin e ri shkollor.

Kryetari i komunës së Gjilanit, Alban Hyseni, thotë se çështja e grevave është çështje në të cilën nuk mund të ndikojnë si komunë. Derisa thekson se janë duke bërë disa investime infrastrukturore në disa shkolla të kësaj komune.

Hyseni: Jemi absolutisht të gatshëm që të fillojmë vitin e ri shkollor

“Çështja e grevës është çështje tjetër. Përgatitjet tona si komunë për pjesën tonë si obligim i kemi bërë të gjitha. Tash kemi filluar me investime në disa prej shkollave në kuptimin e nyejve sanitare, ose kemi edhe dy shkolla të tjera që janë duke u punuar në programin e efiçiencës, ku po bëhen ndryshime në infrastrukturë. Ndërkohë, që pjesa tjetër, ne jemi absolutisht të gatshëm që të fillojmë vitin, ndërsa pjesa e grevës është edhe nivel tjetër i diskutimit dhe punë që nuk mund të ndikojmë ne si komunë”, thotë Hyseni.

Lidhur me investimet kapitale në këtë komunë, i pari i Gjilanit tha se tashmë kanë nisur disa projekte infrastrukturore në vlerë prej 7.5 milionë eurosh.

Hyseni: Tash kemi filluar me disa prej projekteve në investime kapitale

“Tash kemi filluar me disa prej projekteve në investime kapitale në kuptimin e infrastrukturës. Koha dhe periudha e pushimeve verore të bashkatdhetarëve na ka gjetur në një periudhë të vështirë për shkak se kemi qenë në një kohë kur nuk kemi dashur t’i fillojmë punimet për shkak të ngarkesës së madhe, të fluksit të madh, ndërkohë dje kemi filluar me projektin e parë që e kemi nënshkruar së fundmi dhe do të presim edhe projekte të tjera, diku 7.5 milionë investime në infrastrukturë... Zona ekonomike, sheshi i qytetit, objekti i ri i administratës komunale, qarkorja e dytë e qytetit janë disa prej projekteve kryesore, ndërkaq ka edhe projekte tjera, investime kapitale në turizëm në shkolla objekte etj., që janë projekte që po rrjedhin paralelisht”, tregon ai.

Si problem kryesor kryetari i Gjilanit, Alban Hyseni përmend borxhet e mëdha të trashëguara nga qeverisja e kaluar.

Sipas tij, prej 26 milionë eurove kanë arritur t’i shlyejnë 3 milionë.

Hyseni: Problemi kryesor janë borxhet milionëshe të trashëguara

“Problemi kryesor dhe kapital që po përballemi sot e kësaj dite janë borxhet e mëdha të trashëguara. 26 milionë euro borxhe prej të cilat në 6 muajt e parë të qeverisjes janë paguar mbi 3 milionë euro, ndërkaq të tjerat po presim që t’i paguajmë ndërkohë”, theksoi ai.

Banorët e Komunës së Gjilanit ballafaqohen me mungesë të ujit të pijes, por udhëheqësi i kësaj komune thotë se pa një investim kapital problemi i ujit nuk mund të zgjidhet.

Hyseni: Pa një investim kapital problemi i ujit nuk zgjidhet

“(Uji) Është problem i kamotshëm. Në dy dekadat e fundit kemi pasur mungesa ekstreme të ujit të pijes në 4-5 raste. Tash për tash gjendja e ujit në liqenin e Perlepnicës prej nga e marrim ujin e pijes është deri diku stabile dhe ka edhe burime të tjera alternative që po punojmë t’i funksionalizojmë. Ka shpime individuale, puse që po mundohemi t’i inkuadrojmë në rrjetin e ujësjellësit, mirëpo pa një zgjidhje kapitale, pa një investim kapital problemi i ujit nuk zgjidhet. Kjo mund të jetë qoftë digë apo liqe akumulues mund të jetë edhe alternativë tjetër e furnizimit e cila tash është duke u punuar për momentin, por nuk janë zgjidhje të shpejta që mund të zgjidhen brenda vitit të parë ose vitit të dytë tonë”, thotë kryetari i Gjilanit.

Sa i takon sektorit shëndetësor, Hyseni thotë se përgjithësisht nuk qëndrojnë keq me staf shëndetësor, por konsideron se duhet të bëjnë një organizim të brendshëm.

Hyseni: Nuk jemi keq me numrin e mjekëve, por duhet organizim i brendshëm

“Nuk është që jemi keq për numrin e banorëve që i kemi në raport me mjekësinë dhe standardet që kërkojnë jemi thuajse mirë dhe në rregull. Ndërkohë, kërkohet dhe ne po mundohemi që të sigurojmë edhe mjekë tjerë shtesë besoj që brenda këtij muaji ose muajit të ardhshëm do të shpallim një konkurs të ri përmes blerjes së shërbimeve me një organizatë të huaj në mënyrë që t’i mbulojmë edhe fshatrat e mëdha me shërbime shëndetësore në orar të plotë. Besoj që jemi mirë në këtë drejtim, na duhet vetëm një organizim i brendshëm”, thotë ai.

Edhe gjilanasit po përballen me reduktime të energjisë elektrike, por kryetari i kësaj komune, Alban Hyseni thotë se si komunë po angazhohen që të sigurojnë rrymë për institucionet vitale.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat