Informatën për keqpërdorime e pranuan, andaj për ta vërtetuar po shkojnë në vendngjarje.
Kolona e makinave të kompanisë për distribuimin e energjisë, asistuar nga Policia e Kosovës, duhet të kalojë nëpër këtë terren malor.
Target i dyshuar është një biznes në Gumnishtë të Gjilanit. Qetësinë pronarit, veç bagëtisë, ia prishi ekipi i KEDS-it.
Këta po identifikojnë pajisjet që i posedon ky biznes.
Të gjitha këto makineri po furnizohen me rrymë, por në mënyrë ilegale. Lidhja e paligjshme, e cila u gjet qindra metra larg lokalit, u këput.
Për shkeljet e gjetura foli menaxheri në KEDS, Fatos Çeku.
Çeku tregoi edhe për procedurat tjera që e presin këtë keqpërdorues të rrymës.
Dyshime për një keqpërdorim tjetër kishte edhe në Viti. Dyshohet për një kabllo ilegale.
Aksioni vazhdoi në lokalitetin Fshati i Ri.
Ekipi i KEDS-it dyshon se rryma po vidhet edhe në këtë objekt.
Keqpërdorime këtu kishin ndodhur edhe herë të tjera, por familjarët u paraqitën vetëm tash, kur e kuptuan se KEDS do ta çojë rastin deri në fund.
Ata nisën ta ngrenë zërin. Arsyetimet nuk ndaleshin. Megjithatë ekipit iu mundësua të hyjë brenda.
Prania e gazetarëve nuk iu pëlqente, por puna duhej kryer.
Këtu u konstatua se ora nuk është e regjistruar.
Nga KEDS-i tregojnë se keqpërdoruesit nuk janë të paktë.
Aksioni në rajonin e Gjilanit do te vazhdojë edhe në disa lokacione të tjera.
