Disa fjalë për poetin Ramadan Musliu

Kultura

Disa fjalë për poetin Ramadan Musliu

Nga: Hejza Art Më: 22 tetor 2021 Në ora: 11:24
Ramadan Musliu

Ramadan Musliu ishte një zotëri i vërtetë, ishte një mik e shok shumë i sinqertë dhe shumë i dashur për të gjithë ata që kanë pasur rastin ta takojnë, qoftë edhe për një kafe. Zotëri i papërsëritshëm në jetën e përditshme, në shoqëri, në krijimtari

Sot bëhet një vit nga vdekja e Ramadan Musiut, poet, kritik letrar, studiues e publicist, mjeshtër i fjalës së shkruar e të mbrumur me kulturë të gjithanshme.

Mik i ngushtë i Presidentit Ibrahim Rugova, i pandashëm nga një miqësi fisnike e të përjetshme me Teki Dërvishin, pastaj me Beqir Musliun, me Jusuf Buxhovin si dhe me krijuesit e gjeneratës, por edhe përkrahës, këshillues dhe motivues i krijuesve të rinj, Ramadan Musliu megjithatë do të mbahet mend si mjeshtër i poezisë, si kritik e studiues letra i palodhshëm dhe i patejkalueshëm.

Veprimtaria shumëdimensionale e Ramadan Musliut do të ngelë udhërrëfim i kristaltë për shumë letrarë si në Kosovë, ashtu edhe në Shqipëri, në Maqedoninë e Veriut si dhe gjithandej ku jetojnë shqiptarët. Letrave shqipe u solli një poezi të veçantë dhe shumë të ndjeshme, kritikës letrare shqiptare i solli një intensitet dhe një qasje objektive që u bë shkollë e kritikës për shumë studiues të rinjë të letërsisë.

Mbi të gjitha, Ramadan Musliu ishte një zotëri i vërtetë, ishte një mik e shok shumë i sinqertë dhe shumë i dashur për të gjithë ata që kanë pasur rastin ta takojnë, qoftë edhe për një kafe. Zotëri i papërsëritshëm në jetën e përditshme, në shoqëri, në krijimtari.

Përveç në krijimtari letrare, në studim e në kritikë, Ramadan Musliu dha ndihmesë të dallueshme edhe në fushën e informimit dhe të politikës! Në vitet e errësirës totale të informimit shqip në Kosovë, kur masat e dhunshme serbe u shtrinë edhe mbi mjetet e informimit të Kosovës, ai do të shpërngulet në Tiranë dhe nga aty do të punojë si redaktorë i të përditshmes “RILINDJA”. Pas çlirimit, me propozim dhe kërkesë të Presidentit Ibrahim Rugova, do të bëhet deputet i Kuvendit të Kosovës, pastaj do të punojë edhe si këshilltar i ministrit të Kulturës.

Një vit pa Ramadan Musliun, komuniteti i poetëve pa një poet të veçantë, kritika letrare pa një kritik e studiues të palodhshëm, njohësit e tij pa një njeri shumë të madh, kultura shqiptare pa një personalitet aq shumë të nevojshëm! Së këndejmi, momentet e ardhshme përkujtuese le të jenë më të dinjitetshme për figurën e të madhit Ramadan Musliu, duke e nderuar me studime e reflektime, me botime të veprave mbi krijimtarinë dhe veprimtarinë komplekse të Ramadan Musliut. Çdo poezi e Ramadan Musliut provokon dhe nxitë studime të veçanta letrare. Një konkurs institucional për studimin e vargut, të poezisë, të veprave të Ramadan Musliut do të ishte një përulje e përkorë para opusit letrar e kritik të DANIT. Do të jenë shumë të vogla veprat tonë që mund t’i bëjmë për DANIN në krahasim me kontributin e tij në letrat dhe në kulturën shqiptare.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat