Vdekja në Prizren nga shpërthimi i bombolës së oksigjenit, rrëfehen familjarët

Prizreni

Vdekja në Prizren nga shpërthimi i bombolës së oksigjenit, rrëfehen familjarët

Më: 7 dhjetor 2020 Në ora: 19:41
I biri i të ndjerit ka rrëfyer momentet e fundit me të atin

Një qytetar ka humbur jetën në spitalin e Prizrenit. Familjarët kanë treguar se si pasojë e shpërthimit të bombolës së oksigjenit ka vdekur një pacient që ka qenë i shtrirë në këtë spital e që ka qenë i infektuar me koronavirus.

I biri i të ndjerit ka rrëfyer momentet e fundit me të atin.

“Momentet problematike me babin janë shfaq në orën 5:30 të mëngjesit, kur ajo boca ë bën filtrimin e oksigjenit ka pëlcit. Në ato momente babi ka mbet pa oksigjen që është shumë kritike për një të sëmurë me Covid-19 të shtrirë në spital me probleme me frymëmarrje”, tha ai.

“Unë është dashtë me dalë jashtë me kërkuar ndihmë te teknikët. Kam dalë jashtë dhe për 5 ose 6 minuta nuk kemi mund me gjet një zëvendësim për qatë gotën e filtrimit …Kem lypë nëpër dhomat e tjera ku ka pas pacientë të shtrirë që me marrë e me zëvendësu e që nuk ka pasë zëvendësim”, tha ai.

“Pasi e kemi gjet e kam shku në dhomë babi ka qenë me nivel të saturimit ka qenë diku 37 e normalja është diku 95 saturimi me qenë. Pasi e kemi rregulluar çështjen e oksigjenomaskës babi ka nis me u përmirësu dhe ka ardhur saturimi diku 59 -60”.

“Pas 10 ose 15 minutave ka ardhur mjeku i turnit të natës. Ai tha se duhet me shku në dhomë emergjente intensive. Ai ka insistu që me e dërgu në dhomë intensive. Babi me vullnetin e tij na ka thënë që s’do me shku. Sepse me shku në Intensivë u dashtë me i kalu goxha do metra të gjata me shtrat lëvizës dhe qajo kohë u kon kritike deri te vdekja”, rrëfen djali i të ndjerit për Kanal10.

“Doktori ka insistuar që gjithqysh me u bo transporti prej dhomës numër 3 ORL në Intensivë me një bocë të oksigjenit portative të cilën ne e kemi përdor një ditë më herët. Babi me bocën e njëjtë ka shku deri në banjo. Ajo bocë nuk u kon e mjaftueshme me mbuluar me oksigjen babin për me bo lëvizjen deri në banjo 15 metra dhe kthim pas deri te oksigjeni stabil i dhomës. I kam thënë mjekut që ajo nuk është e mjaftueshme për me çuar në intensivë, mjeku ka insistu që saturimi është poshtë dhe që s’po leni me bo punën si duhet’. Edhe pse babi ka refuzu unë jam pajtu. Mjekët e kanë marrë me dërguar me saturim 59 ose 60. Gjatë transportit të babit prej dhomës deri te Intensivi saturimi i ka shku babit 43. Kur kemi shku te ashensori ata s’kanë qenë të përgatitur. S’kanë pasur as kartelë me të cilën munden me çelë ashensorin dhe me hy brenda. Ne u dashtë para derës së ashensorit me prit për 3 ose 4 minuta derisa e kanë marrë një kartelë me çelë derën. Babi ka qenë në gjendje të vështirë në ato raste”, shpjegoi ai.

“Kemi hypë në ashensor unë babi dhe mjeku i turnit të natës që s’ja di emrin. Kemi tentuar me shkuar lartë por s’ka punuar lifti, s’ka punuar kartela s’di ku ka qenë problemi. Kur kemi mbërri një kat më lart lifti nuk është hapë dhe ne kemi mbet brenda në lift për 5deri 7 minuta me babën me një gjendje kritike dhe me një bocë që unë i kam tregu mjeku paraprakisht që nuk është e mjaftueshme për babën. Edhe pse saturimi ka shku duke u zbrit gradualisht me qëndrimin brenda liftit për 5 deri 7 minuta boca është ndalë krejt. S’ka pas oksigjen mjaftueshëm. Fatkeqësisht babi në ashensor më ka ndërruar jetë”, theksoi ai.

Ai tha se rastin e kanë lajmëruar në polici.

commentFirst article
Më të lexuarat
Sot mund të lexoni Shfletoni kopertinat