​LVV s’pret probleme për presidentin, nga PDK-ja dhe LDK-ja tregojnë se a do ta votojnë Vjosa Osmanin për presidente

Aktuale

​LVV s’pret probleme për presidentin, nga PDK-ja dhe LDK-ja tregojnë se a do ta votojnë Vjosa Osmanin për presidente

Më: 27 shkurt 2021 Në ora: 10:12
Vjosa Osmani dhe Albin Kurti

Lëvizja Vetëvendosje si parti fituese e zgjedhjeve të 14 shkurtit nuk po pret probleme për zgjedhjen e presidentit të vendit. Partia e Albin Kurtit shprehet e bindur se subjektet tjera parlamentare nuk do të bëhen pengesë për formimin e institucioneve. Por Partia Demokratike e Kosovës thotë se nuk kanë vota për Vjosa Osmanin presidente. Ndërkohë ish bashkëpartiakët e kësaj të fundit në Lidhjen Demokratike të Kosovës shprehën në mëdyshje për vendimmarrjen që do ta kenë në momentin e zgjedhjes së presidentit.

Zëdhënësi i Lëvizjes Vetëvendosje, Përparim Kryeziu thotë se humbësit e zgjedhjeve (PDK-LDK-AAK), e kanë kuptuar mesazhin e qytetarëve dhe nuk do të bëhen pengesë për formimin e institucioneve.

Kryeziu: Nuk do të paraqesin pengesa për formimin e institucioneve

Image
Përparim Kryeziu

“Meqenëse rezultatet kanë qenë të qarta dhe kur e them këtë, për dallim prej secilit proces zgjedhor, ky proces zgjedhor ka rezultatet më të qarta në dy drejtime. E ka rezultatin e qartë se kush është fituesi dhe kush janë humbësit... Prandaj besoj që (PDK-LDK-AAK) e kanë kuptuar edhe rezultatin, edhe nevojën për reformë të brendshme për diskutim që shkakton një reformim të brendshëm. Për këtë besoj se ata nuk do të paraqesin asnjë pengesë për formimin e institucioneve, pasi ndonëse mund të tingëllojë paradokse, është për të mirën e tyre”, deklaron ai.

Zëdhënësi i PDK-së, Avni Bytyçi thotë se nuk kanë votë për Vjosa Osmani si presidente, pasi nuk dëshirojnë të bëhen patericë e asnjë partie tjetër politike.

Bytyçi: Partia Demokratike e Kosovës nuk ka votë për Osmani si presidente

Image
Avni Bytyçi

“Nuk besoj që Partia Demokratike e Kosovës është votuar nga mijëra qytetarë që të jetë patericë e partive tjera të cilat kanë fituar këto zgjedhje dhe po tregohen të paaftë për të zgjidhur këtë çështje. Ne jemi parti opozitare, si e tillë do të sillemi edhe në Kuvend...Partia Demokratike e Kosovës nuk ka votë për zonjën Osmani si presidente”, thotë ai.

Naser Rugova nga LDK thotë se vendimin për votimin ose jo si presidente të Vjosa Osmanit duhet ta merr kryetari dhe kryesia e re e partisë.

Megjithëkëtë, ai deklaron, se mbetet edhe në vullnetin e deputetëve të zgjedhur, pasi, sipas tij, të njëjtit mund t’ia bëjnë kuorumin Osmanit për t’u bërë e para e shtetit.

Rugova: Këtë vendim duhet ta marrin kryetari dhe kryesia e re e partisë

Image
Naser Rugova

“Këtë vendim duhet ta marrin kryetari dhe kryesia e re e partisë dhe jo kjo kryesi në ikje që na solli këtë debakël zgjedhor. Tjetra duhet ta vlerësojmë edhe vullnetin e deputetëve. Cila kryesi në një parti të tillë i detyron deputetët të marrin vendime këndej ose andej. Personalisht zonja Osmani ka shkuar mendoj në një parti politike më rivale me LDK-në. Ajo nëse pretendon të bëhet presidente, duhet të bisedojë me të gjitha paritë politike, duhet të afrojë konceptin dhe vizionin e saj dhe është përgjegjësi e fituesit të garës si do t’i bëjë numrat. Por unë mendoj që deputetët e LDK-së në qoftë se, disa nga ata e kanë zgjedhur Hashim Thaçin president, mos ta votojnë zonjën Osmani, por pse mos ta bëjnë kuorumin. Tek e fundit e kanë fituar garën dhe ne e kemi humbur zgjedhjet”, deklaron Rugova.

Media ka provuar të marrë një qëndrim edhe nga Aleanca për Ardhmërinë e Kosovës, mirëpo të njëjtit nuk kanë qenë të qasshëm.

Vjosa Osmani ka mandat deri më 5 maj të qëndrojë në zyrën e presidentit të vendit si ushtruese detyre, ndërsa procedurat për zgjedhjen e të parit të shtetit duhet të fillojnë një muaj më herët, më 5 prill.

Shfaq komentet
comments powered by Disqus
Sot mund të lexoni Shfletoni kopertinat