Izraeli do të lejojë një “sasi bazë” ushqimi në Rripin e Gazës, tha zyra e kryeministrit të dielën, pasi u përball me presion në rritje për të hequr një bllokadë totale të vendosur më shumë se dy muaj më parë.
Njoftimi erdhi disa orë pasi ushtria tha se kishte filluar “operacione të gjera tokësore” në një fushatë të intensifikuar rishtazi në Gaza, dhe ndërsa Izraeli dhe Hamasi u angazhuan në bisedime indirekte për një marrëveshje për të ndaluar potencialisht luftimet.
Zyra e kryeministrit Benjamin Netanyahu bëri të ditur se me rekomandimin e ushtrisë, “Izraeli do të autorizojë hyrjen e një sasie bazë ushqimi për popullsinë për të siguruar që një krizë urie të mos zhvillohet në Rripin e Gazës”.
Një krizë e tillë do të rrezikonte operacionin e ri të ushtrisë, tha ajo, duke shtuar se Izraeli do të “veprojë për të parandaluar Hamasin nga sekuestrimi i kësaj ndihme humanitare”.
Izraeli theksoi se bllokada e tij që nga 2 marsi kishte për qëllim të detyronte lëshime nga grupi militant palestinez, por agjencitë e OKB-së kanë paralajmëruar për mungesa kritike të ushqimit, ujit të pastër, karburantit dhe ilaçeve.
Javën e kaluar, presidenti i SHBA-së, Donald Trump, një aleat kritik, pranoi se “shumë njerëz po vdesin urie”, duke shtuar se “ne do ta zgjidhim këtë çështje”.
Dhe ministri i Jashtëm francez, Jean-Noel Barrot, i bëri thirrje Izraelit, pas njoftimit të fundit, që të lejojë rifillimin e menjëhershëm, masiv dhe të papenguar të ndihmës.
Ushtria izraelite njoftoi të dielën se trupat kishin “filluar operacione të gjera tokësore në të gjithë Rripin verior dhe jugor të Gazës” dhe “aktualisht po vendosen në pozicione kyçe”.
Fushata e intensifikuar, e cila sipas Izraelit synon të lirojë pengjet dhe të mposhtë Hamasin, filloi të shtunën, ndërsa të dy palët hynë në bisedime indirekte në Katar për një marrëveshje.
Që kur një armëpushim dy-mujor dështoi në mars, ndërsa Izraeli rifilloi ofensivën e tij, negociatat e ndërmjetësuara nga Katari, Egjipti dhe Shtetet e Bashkuara nuk kanë arritur asnjë një përparim.
Netanyahu ka kundërshtuar përfundimin e luftës pa humbjen totale të Hamasit, ndërsa Hamasi ka hezituar të dorëzojë armët e tij.
