Bullgarët shkojnë në Turqi për blerje pas rënies së lirës

Bota

Bullgarët shkojnë në Turqi për blerje pas rënies së lirës

Më: 21 dhjetor 2021 Në ora: 12:31
Foto ilustrim

Para një dyqani të qytetit historik turk, Edirne, ndodhen shumë autobusë bullgarë. Kjo skenë ndoshta e përshkruan më së miri krizën e valutës shtetërore, lirës.

Qyteti me shumë xhami në skajin perëndimor të Turqisë dikur ishte kryeqytet i Perandorisë Osmane, kur ajo ishte duke u zgjeruar në Lindje të Mesme e Evropë në shekujt XIV dhe XV, shkruan France24.

Tani, Edirne është vendi ku blerësit nga Bullgaria e pjesë të tjera të Ballkanit – edhe vetë disa nga shtetet më të varfra në Evropë – shkojnë për të blerë rezerva për shumëçka, nga veshjet e brendshme deri tek arrat, për shkak të çmimeve më të lira se në atdhe.

“Për ne, kriza është e mirë, por është shumë e keqe për popullin turk. Ne ishim në gjendje të ngjashme ndoshta para 10, 11, 12 vjetëve. Është shumë vështirë”, tha rrëfyesja e udhëtimeve, Daniela Mircheva, para se të hipte në autobusin që do ta çojë në vendlindje, në Yambol.

Vlera e lirës ka pësuar rënie për shkak të ndikimit të një eksperimenti ekonomik të Presidentit Erdogan, i cili po synon ta rrisë përkrahjen para zgjedhjeve të vitit 2023.

Sidoqoftë, duket se bullgarëve nuk u ka mbetur shumë kohë për blerje me çmime të lira. Lira shënoi rritje të vlerës prej 15 për qind të martën, duke e vazhduar rimëkëmbjen historike pas rekordit të shifrave të ulëta, pasi Presidenti Rexhep Erdogan publikoi një plan për të cilin tha se do t’i garantojë depozitat e valutës vendëse kundër luhatjeve të tregut.

Valuta u forcua të martën në mëngjes, pas orës gjashtë, duke u tregtuar me 11.09 njësi për një dollar amerikan, shkruan Reuters.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat