SHBA-Koreja e Jugut, gatishmëri të lartë ushtarake përballë rrezikut nga Koreja e Veriut

Bota

SHBA-Koreja e Jugut, gatishmëri të lartë ushtarake përballë rrezikut nga Koreja e Veriut

Më: 21 maj 2022 Në ora: 16:26
Presidenti Joe Biden dhe Presidenti i Koresë së Jugut Yoon Suk-youl duke kaluar përpara rojes së nderit në Seul (21 maj 2022)

Nga Seuli, Presidenti amerikan Joe Biden sinjalizoi angazhimin e përbashkët me Korenë e Jugut për një gatishmëri më të lartë ushtarake përballë provave më të fundit me raketa nga Koreja e Veriut, e cila po përballet gjithashtu me një valë të lartë infektimesh nga COVID-19. Presidenti amerikan konfirmoi se Shtetet e Bashkuara kanë ofruar të ndihmojnë me vaksina Korenë e Veriut dhe Kinën, por se nuk kanë marrë përgjigje.

Presidenti amerikan Joe Biden dhe ai i Koresë së Jugut Yoon Suk Yeol sinjalizuan për një gatishmëri më të lartë ushtarake ndërkohë që Koreja e Veriut ka bërë disa testime raketash balistike dhe ndoshta edhe një provë bërthamore.

“Sot, President Yoon dhe unë u zotuam të forcojmë angazhimin tonë dhe të punojmë së bashku për t’u përballur me sfidat e sigurisë rajonale dhe rrezikun që përbën Koreja e Veriut duke forcuar gatishmërinë tonë parandaluese dhe për të punuar së bashku për çnuklearizim të plotë të Gadishullit Korean”, tha Presidenti Biden gjatë një konference për shtyp në Seul.

Koreja e Jugut ishte ndalesa e tij e parë gjatë një vizite gjashtëditore në Korenë e Jugut dhe në Japoni.

Dy presidentët ranë dakort për organizimin e stërvitjeve më të mëdha ushtarake dhe dislokimin e armatimit amerikan për të parandaluar veprimet destabilizuese të Koresë së Veriut.

“Diskutuam dislokimin e mjeteve të ndryshme strategjike, përfshirë avionë luftarakë dhe raketa, si dhe vendosëm të vazhdojmë konsultime të detajuara mes këshillave të sigurisë kombëtare të të dy vendeve”, tha Presidenti i Koresë së Jugut, Yoon Suk-Yeol.

Presidenti Biden shtoi se Uashingtoni ka ofruar të ndihmojë me vaksina ndaj COVID-19, madje edhe Kinën dhe Korenë e Veriut.

Image
Foto nga takimi

“I kemi ofruar vaksina, jo vetëm Koresë së Veriut, por edhe Kinës. Jemi të gatshëm ta realizojmë menjëherë. Nuk kemi marrë përgjigje. Për sa i përket çështjes nëse do ta takoja udhëheqësin e Koresë së Veriut, kjo do të varet nëse do të tregohej i sinqertë dhe serioz”¸ tha Presidenti Biden.

Koreja e Veriut ka njoftuar shifra të larta pacientësh me COVID-19 për disa ditë me radhë, por ky vend nuk disponon vaksinat e duhura apo ilaçet moderne për të luftuar pandeminë.

Dy presidentët thanë se aleanca e hershme prej dekadash mes dy vendeve do të angazhohet edhe për një rajon Indo-Paqësor të lirë dhe të hapur për tregtinë, duke ruajtur kështu zinxhirimin global të furnizimit. Me dëshirën për të luajtur një rol më të madh në çështjet rajonale, Koreja e Jugut njoftoi se do të bëhet pjesë e iniciativës Kuadri Ekonomik Indo-Paqësor (IPEF) që Presidenti Biden do ta shpallë gjatë kësaj vizite të tij në Azi./VOA

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat