OAK kërkon sërish heqjen e orës policore: Vendim tepër i dëmshëm për punëtorët dhe bizneset

Ekonomi

OAK kërkon sërish heqjen e orës policore: Vendim tepër i dëmshëm për punëtorët dhe bizneset

Më: 24 janar 2022 Në ora: 17:22
Foto ilustrim

Oda e Afarizmit të Kosovës (OAK) në emër të komunitetit të bizneseve që përfaqëson ka kërkuar edhe njëherë nga Qeveria e Kosovës largimin e orës policore dhe kushtëzimin e vendosur për hyrje në Kosovë, me tre vaksina përmes vendimit nr. 01/55.

Në një komunikatë për media, OAK ka bërë të ditur se kërkesën e kanë përsëritur përmes një shkrese të përcjellë tek kryeministri Albin Kurti dhe ministrat e linjës. 

Sipas OAK-së obligimi për vaksinim me tri doza të vaksinës po ndikon që edhe më shumë të kufizohet lëvizja e qytetarëve si dhe qarkullimi i bizneseve.

“Bazuar në pikën 14 të Vendimit Nr. 01/55 thuhet që ‘Kufizimi i qarkullimit të qytetarëve do të jetë nga ora 22:00 deri në ora 05:00’, përmes këtij vendimi vazhdon të kufizohet ushtrimi i veprimtarisë për sektore të veçanta”, thuhet në komunikatë.

Gjithashtu, OAK kërkon që me urgjencë të përkrahen punëtorët dhe bizneset që u mbyllën apo u është kufizuar shfrytëzimi i hapësirës në 30%, 50% apo 70%., pasi që si rezultat i këtij kufizimi janë dëmtuar qindra biznese dhe kanë mbetur pa punë mijëra punëtor. 

“Oda e Afarizmit të Kosovës vazhdimisht bënë thirrje tek komuniteti i biznesit që të respektohen masat e vendosura nga Institucionet e Republikës së Kosovës, mirëpo gjithashtu po kërkon nga Qeveria e Kosovës që çdo vendim për ndalim të ushtrimit të veprimtarisë apo përgjysmim i tij të përcillet me përkrahje financiare. Çdo qytetari të Republikës së Kosovës, përmes Kushtetutës së vendit, i sigurohet e drejta e ushtrimit të punës. Duke marrë parasysh që aktualisht jemi në një situatë të jashtëzakonshme, më e pakta që mund të bëjë shteti për qytetarin që nuk e lejon të punojë është t’i ofrojë përkrahje financiare”, thuhet po aty. 

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat