Tregu i Gjelbër, premtime shumë por jo edhe veprime

Ekonomi

Tregu i Gjelbër, premtime shumë por jo edhe veprime

Më: 28 tetor 2025 Në ora: 21:44
Tregu i Gjelbër në kryeqytet

Tregu i Gjelbër në kryeqytet, me gjithë paralajmërimet për investime nga Agjencia Kosovare e Privatizimit dhe Komuna e Prishtinës, vazhdon të mbetet me çati të improvizuara nga tregtarët dhe me infrastrukturë të amortizuar. Derisa AKP dhe Komuna e Prishtinës ia hedhin përgjegjësinë njëra-tjetrës, tregtarët janë ata që vazhdojnë të punojnë në kushte të rënda.

Ndonëse shpesh publikisht është premtuar se kushtet në Tregun e Gjelbër të kryeqytetit do të përmirësohen, gjithçka ka mbetur vetëm fjalë. Pavarësisht paralajmërimeve për tenderë e investime nga Agjencia Kosovare e Privatizimit dhe Komuna e Prishtinës, tregu mbetet i mbuluar nga mbeturinat, me çati të improvizuara nga tregtarët dhe me infrastrukturë të amortizuar. Tregtarët e vjetër të këtij tregu, vënë në pah se nëpër stinë përballen me kushte të rënda, ndonëse janë munduar me forcat e veta ta mbajnë funksional këtë treg.

“Kem do variante tjera që e përjetojmë, se ka qenë edhe më ftohtë (-19*C)-(-20*C), por shumica e kemi përjetuar në qeto kushte kështu. Po këqyri këta! Kjo është katastrofë. Për këtë e ka lëshuar, krejt ky rend e ka lëshuar tregun. S’ka kurrfarë kushte, na i kemi bërë këto vet, pak do kushte sa mos me na pikë por prapë po pikë se uji depërton”, tha Rrahim Govori, tregtar.

Për gjendjen e rëndë të tregut, Agjencia Kosovare e Privatizimit, në një përgjigje me shkrim muaj më parë, pati nënvizuar se mirëmbajtja e tregjeve të Prishtinës është deleguar te Ndërmarrja Publike Banesore dhe se janë në proces të investimeve për përmirësimin e kushteve. Megjithatë, në terren nuk shihet asnjë ndryshim.

Ndërkohë, Komuna e Prishtinës, pavarësisht asaj se ka paralajmëruar shpalljen e tenderit për Tregun e Gjelbër në muajin prill të këtij viti, asnjë lëvizje nuk ka në këtë drejtim. Sipas planit të tyre, tregu do të rilokohej përkohësisht në një hapësirë tjetër deri në rindërtimin e objektit të ri, plan që ende nuk ka nisur.

“Tregu është mirë, po kushte nuk ka. Banorët që punojnë këtu janë lodhë. Pikon uji, lagën, e punojnë veç për një copë bukë. Kështu nuk ka as vullnet, as me punu, as me jetu. E shiu e bora i shkatërron krejt”, tha Sevdije Shoku, blerëse.

Premtimet për rindërtimin e Tregut të Gjelbër kanë mbetur në letër. Ndërsa AKP dhe Komuna e Prishtinës hedhin përgjegjësinë njëra mbi tjetrën, tregtarët vazhdojnë të punojnë në kushte të rënda pa shpresë se diçka do të ndryshojë së shpejti.

comment Për komente lëvizni më poshtë
Sot mund të lexoni Shfletoni kopertinat