Agjencia e Sigurisë Shëndetësore në Britaninë e Madhe (UKHSA) thotë se 62 persona kanë pasur katër teste pozitive, secili prej tyre me të paktën 90 ditë largësi, që nga fillimi i pandemisë, ndërsa 7.640 të tjerë ishin infektuar tri herë deri më 6 mars 2022, kur u mblodhën të dhënat.
Në total, ka pasur 715.154 ri-infeksione, sipas raportit të fundit javor të UKHSA të mbikëqyrjes së gripit dhe COVID.
Shifrat janë për Anglinë, duke sugjeruar që totali i Britanisë së Madhe do të jetë edhe më i lartë.
Paul Hunter, profesor i Mjekësisë pranë Universitetit të Anglisë Lindore, tha se njerëzit që janë ri-infektuar disa herë ka të ngjarë të kenë pasur variante të ndryshme të virusit.
Por edhe nëse virusi ndaloi së zhvilluari tani, imuniteti ndaj infeksioneve të kapura përmes hundës dhe fytit është aq jetëshkurtër sa njerëzit ka të ngjarë të riinfektohen çdo dy vjet ose më shumë.
"Ky virus do të jetë pjesë e jetës sonë. Shumë prej nesh do të ri-infektohen çdo disa vjet. Edhe nipërit e mbesave tona do të vazhdojnë të preken me COVID," tha Hunter për Sky News.
Megjithatë, ai tha se megjithëse imuniteti kundër virusit zbehet, ai ende parandalon sëmundjet serioze, kështu që periudhat pasuese të COVID janë më të buta.
Mendohet se gjasat për të vuajtur nga një ri-infeksion është pjesërisht për shkak të gjenetikës së sistemit imunitar ose një çështjeje shëndetësore që mund të parandalojë funksionimin e tij gjithashtu.
Kontakti i lartë me njerëzit e tjerë rrit gjithashtu mundësitë për të kapur virusin.
Raporti i UKHSA konfirmon se rastet e COVID-19 po rriten në të gjitha grup-moshat, të udhëhequr nga njerëz në të 30-at dhe 40-at e tyre.
Ai thotë se rritja ka të ngjarë të jetë për shkak të rritjes së kontakteve sociale, përfundimit të rregullave të vetizolimit dhe përhapjes së shpejtë të versionit më infektiv BA.2 të omicron. Por vaksina është ende po aq efektive kundër BA.2 dhe infeksioni që shkakton nuk është më i rëndë.
Hulumtimi i ri nga UKHSA, i publikuar në revistën “Lancet”, nënvizon kërcënimin e reduktuar të omicron në krahasim me variantin dominues më parë, delta.
Rezultatet tregojnë se infeksioni me omicron ka 59% më pak rrezik të shtrimit në spital dhe 69% rrezik më të ulët të vdekjes sesa delta.
Sipas shifrave të fundit të qeverisë, 534.747 njerëz në Britaninë e Madhe rezultuan me koronavirus në shtatë ditët e fundit ose rreth 44% më shumë krahasuar me javën e kaluar. Gjithashtu, në shtatë ditët e fundit ka pasur 740 vdekje të lidhura me koronavirusin.
