Dy persona të skuadrës Aston Martin kanë dalë pozitivë me koronavirus, gjatë testeve që janë kryer ditën e enjte në Bahrein, 24 orë para provave të lira të ditës së sotme. Ky lajm ka tronditur mjaft Formula 1, që të dielën (28 mars) do të zhvillojë në pistën e Sakhir garën e parë sezonale.
Dy personat që kanë dalë pozitivë janë vendosur menjëherë në karantinë në hotel, por e gjithë skuadra është vetizoluar përkohësisht, si pjesë e protokollit shëndetësor që aplikon Formula 1. Skuadra Aston Martin bëri me dije se po monitoron situatën, duke kryer të tjerë tamponë te skuadra.
Skuadra e Aston Martin, ku garon Sebastian Vettel, për momentin nuk rrezikon të mungojë në garën e parë sezonale, apo kjo garë të anullohet, siç ndodhi një vit më parë në Australi.
Gjithsesi, situata është e nderë në pistën e Sakhir dhe priten lajme të reja për sa i përket këtyre rasteve me koronavirus.
